ବୌଦ୍ଧ: ବୌଦ୍ଧରେଞ୍ଜ ଅନ୍ତର୍ଗତ ବଘିଆପଡା ସେକସନ୍ର କନକପୁର ଗ୍ରାମ ନିକଟରୁ ବନବିଭାଗ ଏକ କୁଟୁରାକୁ ଉଦ୍ଧାର କରିଥିବା ଜଣାପଡିଛି । ମିଳିଥିବା ସୂଚନା ଅନୁଯାୟୀ କନକପୁର ଗ୍ରାମ ନିକଟରେ ଥିବା ଏକ କଦଳୀ ବଗିଚା ମଧ୍ୟରେ ଏକ ଜଙ୍ଗଲୀ କୁଟୁରା ବାଟବଣା ହୋଇ ରହିଯାଇଥିବା ସ୍ଥାନୀୟ ଲୋକେ ଆଜି ସକାଳେ ଦେଖିବାକୁ ପାଇଥିଲେ । ଲୋକ ଗହଳି ଦେଖି କଦଳୀ ବଗିଚା ମଧ୍ୟରେ ଇତସ୍ତତଃ ହୋଇ ସେ ଡେଇଁବାରେ ଲାଗିଥିଲା । ଏହାପରେ ଲୋକମାନେ ବନବିଭାଗକୁ ଖବର ଦେଇଥିଲେ । ବନବିଭାଗ କର୍ମଚାରୀମାନେ କୌଶଳକ୍ରମେ କୁଟୁରାକୁ ଉଦ୍ଧାରକରି ହରଭଙ୍ଗା ବ୍ଲକ ଦେବଗଡ ନିକଟ ବାଙ୍କମୁଣ୍ଡି ସଂରକ୍ଷିତ ଜଙ୍ଗଲରେ ଛାଡିଥିଲେ । ବନାଞ୍ଚଳ ଅଧିକାରୀ ଆଶିଷ କୁମାର କହଁର, ବନରକ୍ଷୀ ପ୍ରକାଶ ପ୍ରଧାନ, ଦୀପକ କୁମାର ନାୟକ, ଜିଲ୍ଲା ଇକୋ କ୍ଲବ ସଂଯୋଜକ ସ୍ୱରାଜ କୁମାର କହଁର, ମାଝିସାହି ବନ ସୁରକ୍ଷା ସମିତିର ସଭାପତି ସୁଶିଳ କୁମାର ପ୍ରଧାନ ଓ ଦୁଃଶାସନ ପ୍ରଧାନ ପ୍ରମୁଖ କୁଟୁରାକୁ ଉଦ୍ଧାର କରିବାରେ ସହଯୋଗ କରିଥିଲେ ।
