ପାଟଣାଗଡ : ବଲାଙ୍ଗୀର ଜିଲ୍ଲା ଖପ୍ରାଖୋଲ ବ୍ଳକ ଏକ ଅନୁନ୍ନତ ଅବହେଳିତ ମରୁଡି ପ୍ରବଣ ବ୍ଳକ ହୋଇଥିବା ବେଳେ ଦାରିଦ୍ର୍ୟ, ଅନାହାର, ଅର୍ଦ୍ଧହାର, ବେରୋଜଗାର, ଦାଦନ ଶ୍ରମିକ, ବଢିବଢି ଚାଳିଛି । ୮୦% ଭାଗ ଲୋକେ କୃଷି ଉପରେ ନିର୍ଭର କରନ୍ତି । ବଲାଙ୍ଗୀର ଜିଲ୍ଲା କୃଷକ ମହାସଂଘ ପକ୍ଷରୁ ଜିଲ୍ଲା ସଭାପତି ଜତିପ୍ରଧାନଙ୍କ ନେତୃତ୍ୱରେ ପୁରୁଣା ପେଟ୍ରୋଲ ପମ୍ପରୁ ଏକ ଶୋଭାଯାତ୍ରାରେ ବାହାରି ବ୍ଳକ କାର୍ଯ୍ୟାଳୟ ଆଗରେ ଧାରଣା ବିକ୍ଷୋଭ ପ୍ରଦର୍ଶନ କରିଥିଲେ । ପରେ ୧୫ ଦଫା ସମ୍ବଳିତ ଦାବିପତ୍ର ମୁଖ୍ୟମନ୍ତ୍ରୀଙ୍କ ଉଦେଶ୍ୟରେ ବିଡିଓ ଜ୍ୟୋତି ରଞ୍ଜନ ରାଉତଙ୍କୁ ପ୍ରଦାନ କରିଥିଲେ । କ୍ରମାଗତ ଭାବରେ ମରୁଡି, ଫସଳହାନୀ ଯୋଗୁଁ ଚାଷୀଙ୍କ ଆର୍ଥିକ ମେରୁଦଣ୍ଡ ଭାଙ୍ଗି ପଡିଥିବା ବେଳେ ଏହି ବ୍ଳକର ଜଳସେଚନ ବ୍ୟବସ୍ଥା ନାମକୁ ମାତ୍ର । ଏଭଳି ପରିସ୍ଥିତିରେ ଲୋକ ଭୋକ ଉପାସରେ ବ୍ୟାକୁଳ ହୋଇଥିବା ବେଳେ ଏହି ବ୍ଳକକୁ କୃଷି ବିଭାଗ ଅଣଦେଖା କରି ମରୁଡି ଘୋଷଣା କରିନଥିବା ଅଭିଯୋଗ ହେଉଛି । ଆଜି ଯେଉଁ ଦାବିପତ୍ର ଦେଇଥିଲେ ସେଥିରେ ଦାବି ଥିଲା କି ଖପ୍ରାଖୋଲ ବ୍ଳକକୁ ସମ୍ପୂର୍ଣ୍ଣ ମରୁଡି ଘୋଷଣା କରାଯାଉ, ସମସ୍ତ ଚାଷୀ ମାନଙ୍କୁ ଋଣ ଛାଡ ସହ ଫି’ ଛାଡ଼ କରାଯାଉ ଓ ନୂତନ ଋଣର ସୁବିଧା କରାଯାଉ, ସିଧାସଳଖ ମରୁଡି ହୋଇଥିବା ଯୋଗୁଁ ଚାଷୀକୁ ଏକର ପ୍ରତି ୨୫ ଶହ ଟଙ୍କା ପ୍ରଦାନ କରାଯାଉ,ଧାନ ଫସଲ ନଷ୍ଟ ହେତୁ କପା ଚାଷରେ ଦୁଇ ହଜାର ଲେଖାଏଁ ବୋନସ ଦିଆଯାଉ । ରବି ଚାଷୀମାନଙ୍କୁ ସାର, ବିହନ ଠିକ୍ ଭାବରେ ଯୋଗାଇ ଦିଆଯାଉ, ଅଚଳ ହୋଇପଡିଥିବା ଉଠା ଜଳସେଚନ ନଳକୂପକୁ ଗଭୀର କରି ଠିକ୍ ପରିମାଣରେ ପାଣି ଯୋଗାଇବା ସହ ମାଗଣା ବିଦ୍ୟୁତ ଦିଆଯାଉ, ସ୍ଥାୟୀ ଉଠାଜଳସେଚନ କରିବା ସଙ୍ଗେ ସଙ୍ଗେ ପୁରୁଣା ବନ୍ଧ, କଟା, କୂଅକୁ ପୁନଃ ଉଦ୍ଧାର କରାଯାଉ,ସମସ୍ତ ପ୍ରକଳ୍ପ ଗୁଡିକକୁ ଯୁଦ୍ଧକାଳୀନ ଭିତ୍ତିରେ ଲଗାଯାଉ, ଖପ୍ରାଖୋଲ ବ୍ଳକରେ ଏକ ଶୀତଳ ଭଣ୍ଡାର ନିର୍ମାଣ କରାଯାଉ, ବଲାଙ୍ଗିର ଜିଲ୍ଲାରେ ଥିବା ବିଜୟାନନ୍ଦ ଚିନିକଳ କୁ ସରକାର ହାତକୁ ନେଇ କାର୍ଯ୍ୟକ୍ଷମ କରିବା, ପ୍ରତ୍ୟେକ ଚାଷୀମାନଙ୍କୁ ପରିଚୟ ପତ୍ର ଦେବା ସହ ଚାଷୀ ପେନସନ ଯୋଜନା ତିଆରି କରାଯାଉ । ଓଡ଼ିଶାର ଉଠାଜଳସେଚନ ନିଗମ ଦ୍ୱାରା କାର୍ଯ୍ୟକାରୀ ହେଉଥିବା ଗଭୀର ନଳକୂପ ଦିଆଯାଇଥିବା ସମସ୍ତ ଯୋଜନା କାର୍ଯ୍ୟକାରୀ କରାଯାଉ, ଖପ୍ରାଖୋଲ ବ୍ଳକରେ ବିଗତ ବର୍ଷ ଚାଷୀମାନଙ୍କ ଦେଇଥିବା ପ୍ରଧାନମନ୍ତ୍ରୀ ଫସଳ ବୀମା କାର୍ଯ୍ୟକାରୀ କରାଯାଉ, ମରୁଡି ସମୟରେ ବ୍ଳକରେ ଦୁଗ୍ଧ ଚାଷୀମାନଙ୍କୁ ରୋଜଗାର ଦେଉଥିବାରୁ ଚାଷୀ ମାନଙ୍କୁ ପ୍ରୋତ୍ସାହନ ଦିଅନ୍ତୁ,ଗତ ବର୍ଷ ଉତ୍କଟ ସାର୍ ଅଭାବ ଦେଖା ଯାଉଥିବା ବେଳେ ଯେଉଁ କଳାବଜାରୀ ଚାଲୁଥିଲା ତାର ପୁଙ୍ଖାନୁପୁଙ୍ଖ ତଦନ୍ତ କରାଯାଉ । ଏସବୁ ଦାବି ଯଦି ପୂରଣ ନ ହୁଏ ଆଗାମୀ ଦିନରେ ଆନ୍ଦୋଳନ ତୀବ୍ରତର ହେବ ବୋଲି ବଲାଙ୍ଗିର ଜିଲ୍ଲା କୃଷକ ସଂଗଠନ ସଭାପତି ଶ୍ରୀ ପ୍ରଧାନ ଚେତାବନୀ ଦେଇଛନ୍ତି । ଜିଲ୍ଲା ଉପସଭାପତି ଚାକଲା ପରିଛା ସଂଘ ବ୍ଳକ ସଭାପତି କ୍ଷମା ନିଧି ପ୍ରଧାନ, ସଂପାଦକ କନ୍ଦର୍ପ ସୁଆର, ସନ୍ତୋଷ ପଟେଲ, ଇନ୍ଦ୍ର ମଣି ସାହୁ,ଗଜନାଗ, ଗୁପ୍ତେଶ୍ୱର କୁଅଁର,କ୍ଷମାନିଧି ବରିହା, ଗନ୍ଧର୍ବ ବରିହା, ସୁନାରାମ ପୁଟେଲଙ୍କ ସମେତ ଶତାଧିକ ଚାଷୀ ଉପସ୍ଥିତ ଥିଲେ ।
