ବୌଦ୍ଧ/ବାଉଁଶୁଣୀ,୪/୪ – ବୌଦ୍ଧଜିଲ୍ଲା ବାଉଁଶୁଣୀ ଥାନା ତାଳ ସରଡା ଗ୍ରାମ ପଞ୍ଚାୟତ କଙ୍କଲା ଗ୍ରାମରୁ 1 ମାସରୁ ଅଧିକ ଦିନ ତଳେ ନିଖୋଜ ଥିବା ଗ୍ରାମର ବିମ୍ବାଧର ମହାକୁଡ (30) ଙ୍କ ଶବ ଆଜି ଡମ୍ବରୁ ଗଡ଼ ଶ୍ମଶାନ ଘାଟ ମହାନଦୀ ବାଲିରୁ ବାଉଁଶୁଣୀ ପୋଲିସ୍ ଉଦ୍ଧାର କରିଛି | ମିଳିଥିବା ସୂଚନା ଅନୁଯାୟୀ ମାସେ ତଳେ କଙ୍କଲା ଗ୍ରାମର ବିମ୍ବାଧର ମହାକୁଡ ନିଖୋଜ ହୋଇଥିବା ତାଙ୍କ ବଡ଼ ଭାଇ ବିମଳ ମହାକୁଡ ଓ ପ୍ରତ୍ୟକ୍ଷ ଦର୍ଶୀ ସତ୍ୟବାନ୍ ମହାକୁଡ ବାଉଁଶୁଣୀ ଥାନା ରେ ଲିଖିତ ଅଭିଯୋଗ କରିଥିଲେ | ବାଉଁଶୁଣୀ ପୋଲିସ୍ ଅଭିଯୋଗକୁ ପଂଜିକୃତ କରି ଚୁପ୍ ବସି ପଡିଥିଲା l ଯେଉଁ ମାନଂକ ସହିତ ନିଖୋଜ ଦିନ ବିମ୍ବାଧର ମହାକୁଡ ଥିଲେ ସେ ସମ୍ପର୍କରେ ସୁଚନା ଦେଇଥିଲେ ମଧ୍ୟ ମାମଲା ଉପରେ ପୋଲିସ କୌଣସି ଗୁରୁତ୍ବ ଦେଇ ନଥିଲା | ଉଚ୍ଚ କର୍ତୃପକ୍ଷ ଓ ପରିବାର ଲୋକ ବାଉଁଶୁଣୀ ପୋଲିସ୍ ଉପରେ ଚାପ ପକାଇବା ପରେ ମାସେ ପରେ ଗତକାଲି ଅଭିଯୋଗ କାରୀଙ୍କ ସୁଚନା ଆଧାରରେ କଙ୍କଲା ଗ୍ରାମର କାର୍ତ୍ତିକ ନାଏକ ଓ ଅମିତ୍ ମହାକୁଡଙ୍କୁ ଆଣି ଅଟକ ରଖି ପଚରା ଉଚୁରା କରିଥିଲା l ସେମାନଙ୍କ ଠାରୁ ଜେରା ବେଳେ ମିଳିଥିବା ତଥ୍ୟ ଓ ସେମାନଙ୍କ ଚିନ୍ହଟ ଅନୁଯାୟୀ ନିର୍ଦ୍ଦିଷ୍ଟ ସ୍ଥାନରେ ନଦୀ ବାଲି ଖୋଳା ଯିବା ପରେ ବିମ୍ବାଧରର ଗଳିତ ଶବ ମିଳିଥିବା ସୂଚନା ମିଳିଛି l ପୋଲିସ୍ ଶବକୁ ବ୍ୟବଚ୍ଛେଦ ପାଇଁଁ ବୌଦ୍ଧ ଡାକ୍ତରଖାନା ଆଣିଥିବା ବେଳେ ଉଭୟଙ୍କୁ ଅଟକ ରଖିଛି | ବିଦ୍ୟୁତ୍ ତାର ଟାଣି ବାରହା ଶିକାର କରୁଥିବା ବେଳେ ଅସାବଧାନତା ବଶତଃ ଅନ୍ଧାରରେ ବିଦ୍ୟୁତ୍ ତାର ସଂସ୍ପର୍ଶରେ ଆସି ବିମ୍ବାଧର ମ୍ରୁତ୍ୟୁ ବରଣ କରିଥିବା ପୋଲିସକୁ ପ୍ରାରମ୍ଭିକ ତଦନ୍ତରୁ ସୁଚନା ମିଳିଛି l ଘଟଣାକୁ ଲୋକ ଲୋଚନକୁ ନ ଆଣିବା ପାଇଁ ଉଭୟେ ମିଶି ମହାନଦୀ ବାଲିରେ ପୋତି ଦେଇଥିବା ପୋଲିସ୍ ଆଗରେ କହିଥିବା ଥାନା ଅଧିକାରୀ ସୁଚନା ଦେଇଛନ୍ତି l
