କ୍ବାରେଣ୍ଟାଇନ୍ ସେଣ୍ଟର୍ ରେ ଯୁବତୀଙ୍କୁ ଦୁଷ୍କର୍ମ ଉଦ୍ୟମ ଅଭିଯୋଗ : ଅଭିଯୁକ୍ତ ଥାନରେ ଅଟକ, ପୋଲିସ୍ ର ତଦନ୍ତ ଆରମ୍ଭ

ବାଲିଗୁଡ଼ା: କ୍ୱାରେଣ୍ଟାଇନ ସେଣ୍ଟରରେ ଯୁବତୀଙ୍କୁ ଦୁଷ୍କର୍ମ ଉଦ୍ୟମ ଅଭିଯୋଗ । ଏଭଳି ଉଦ୍ୟମ କରିଛି କ୍ୱାରେଣ୍ଟାଇନ ସେଣ୍ଟରରେ ଥିବା ଅନ୍ୟ ଜଣେ ଯୁବକ । କନ୍ଧମାଳ ଜିଲ୍ଲା ଦାରିଙ୍ଗବାଡ଼ିର ଏକ କ୍ୱାରେଣ୍ଟାଇନ ସେଣ୍ଟରରୁ ଆସିଛି ଏଭଳି ଅଭିଯୋଗ । ଅଭିଯୋଗ ପ୍ରକାରେ ଅଭିଯୁକ୍ତକୁ ପୋଲିସ ଥାନାରେ ଅଟକ ରଖି ଅଧିକ ପଚରାଉଚରା ଚଳାଇଥିବା ଜଣାପଡ଼ିଛି । ସୂତ୍ର ମୁତାବକ ଦାରିଙ୍ଗବାଡ଼ି ଡଃ ବି.ଆର. ଆମ୍ବେଦକର କଲେଜ ଛାତ୍ରାବାସରେ ହୋଇଥିବା କ୍ୱାରେଣ୍ଟାଇନ୍ ସେଣ୍ଟରରେ ଏଭଳି ଘଟଣା ଘଟିଥିବା ଜଣାପଡ଼ିଛି । ଏଠାରେ ୨ଶହ ଶଯ୍ୟା ବିଶିଷ୍ଟ କ୍ୱାରେଣ୍ଟାଇନ ସେଣ୍ଟର ରହିଛି । ଉଭୟ ପୁରୁଷ ଏବଂ ମହିଳା ପ୍ରବାସୀ ଓଡ଼ିଆ ଏହି ସେଣ୍ଟରରେ ରହିଛନ୍ତି । ତେବେ ପୀଡ଼ିତାଙ୍କୁ କ୍ୱାରେଣ୍ଟାଇନରେ ରହିଥିବା ଜଣେ ଯୁବକ ଦୁଷ୍କର୍ମ ଉଦ୍ୟମ କରିଥିବା ଅଭିଯୋଗ ହୋଇଛି । ରାତି ପ୍ରାୟ ତିନିଟା ସମୟରେ ପୀଡ଼ିତା ଶୌଚ ହେବାକୁ ଯାଇଥିବା ବେଳେ ଅଭିଯୁକ୍ତ ତାଙ୍କୁ ଏଭଳି ଉଦ୍ୟମ କରିଥିବା ଅଭିଯୋଗ ହୋଇଛି ।
ଅନ୍ୟପଟେ ଅଭିଯୋଗ ପରେ ପୁରା ଘଟଣାର ପୋଲିସ ତଦନ୍ତ କରୁଥିବା ଜଣାପଡ଼ିଛି । ଏପରିକି ଅଭିଯୁକ୍ତ ଯୁବକକୁ ଥାନାରେ ଅଟକ ରଖାଯାଇଛି ।
ପ୍ରକାଶ ଥାଉକି ଗତ ୧୩ ତାରିଖରେ ତାମିଲନାଡୁ, ବେଙ୍ଗାଲୁରୁ, ମହାରାଷ୍ଟ୍ର ଇତ୍ୟାଦି ସ୍ଥାନରୁ ଫେରିଥିବା ପ୍ରବାସୀ ଓଡ଼ିଆଙ୍କୁ ଏହି କ୍ୱାରେଣ୍ଟାଇନ ସେଣ୍ଟରରେ ରଖାଯାଇଛି । ଏମାନଙ୍କ ମଧ୍ୟରେ ୧୯ ଜଣ ଯୁବକ, ଜଣେ ୫ ବର୍ଷର ଶିଶୁ ରହିଛନ୍ତି ଏବଂ ୯ ଜଣ ଯୁବତୀ ରହିଛନ୍ତି । ଆଉ ଅଳ୍ପ ଦିନ ଭିତରେ ଏମାନଙ୍କ କ୍ୱାରେଣ୍ଟାଇନ ସରିବାର ଅଛି । ହେଲେ ଏହାରି ଭିତରେ କ୍ୱାରେଣ୍ଟାଇନ ସେଣ୍ଟରରୁ ଆସିଛି ଏଭଳି ଅଭିଯୋଗ । କ୍ବାରେଣ୍ଟାଇନ୍ ସେଣ୍ଟର୍ କୁ ନେଇ ପ୍ରଶାସନ କେତେ ସଜାଗ ଘଟଣାରୁ ବେସ୍ ଅନୁମେୟ ।