ବୌଦ୍ଧ : ଆଜି ଅପରାହ୍ନ ପ୍ରାୟ ୨ଘଣ୍ଟା ସମୟରେ ଚାରିଛକ-କୁଶଙ୍ଗ ରାଜ୍ୟ ରାଜପଥର ହରଭଙ୍ଗା ଥାନା ଅଯୋଧ୍ୟା ଗ୍ରାମ ନିକଟରେ ବାଇକ୍ ଦୁର୍ଘଟଣାରେ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିବା ଜଣାପଡିଛି । ମିଳିଥିବା ସୂଚନା ଅନୁଯାୟୀ ଛତ୍ରଙ୍ଗ ଗ୍ରାମର କୃଷ୍ଣଚନ୍ଦ୍ର ବାରିକ(୪୫) କୌଣସି କାମରେ କୁଶଙ୍ଗ ଯାଇ ନିଜ ଗ୍ରାମ ଛତ୍ରଙ୍ଗକୁ ବାଇକ୍ ଯୋଗେ ଫେରୁଥିବା ବେଳେ ଅଯୋଧ୍ୟା ସ୍କୁଲ ନିକଟ ବୁଲାଣିରେ ଭାରସାମ୍ୟ ହରାଇ ରାସ୍ତାକଡର ଏକ ଗଛ ସହ ଧକ୍କା ହୋଇଥିଲା । ତାଙ୍କ ମୁଣ୍ଡରେ ପ୍ରଚଣ୍ଡ ଧକ୍କା ଲାଗିଥିବାରୁ ସେ ଘଟଣାସ୍ଥଳରେ ହିଁ ପ୍ରାଣବାୟୁ ଉଡିଯାଇଥିଲା । ହରଭଙ୍ଗା ପୁଲିସ ଦୁର୍ଘଟଣା ସ୍ଥଳରେ ପହଞ୍ଚି ଶବକୁ ଜବତ କରି ପୋଷ୍ଟମର୍ଟମ ପାଇଁ ବୌଦ୍ଧ ଡାକ୍ତରଖାନାକୁ ପଠାଇଥିବା ଜଣାପଡିଛି । ମୃତ କୃଷ୍ଣଚନ୍ଦ୍ର ଏକ ଘରୋଇ ଯାତ୍ରୀବାହୀ ବସରେ ଡ୍ରାଇଭର ଭାବେ କାମ କରୁଥିଲେ । ତାଙ୍କର ଦୁର୍ଘଟଣାଜନିତ ଅକାଳ ବିୟୋଗରେ ଛତ୍ରଙ୍ଗ ଅଂଚଳରେ ଗଭୀର ଶୋକର ଛାୟା ଖେଳିଯାଇଛି ।
