ବୌଦ୍ଧ – ଆଜି ସନ୍ଧ୍ୟା ପ୍ରାୟ 7 ଘଣ୍ଟା ସମୟରେ ଜାତୀୟ ରାଜପଥ ନମ୍ବର୍ 57 ର ମଧୁପୁର ଛକ ନିକଟରେ ଦୁଇଟି ବାଇକ ମଧ୍ୟରେ ଧକ୍କା ହେବାରୁ କଦଳୀଗଡ଼ ପଂଚାୟତ କନ୍ଧରା ଗ୍ରାମର ଦମ୍ପତ୍ତି ଗୁରୁତର ଆହତ ହୋଇଥିବା ଜଣାପଡିଛି l ମିଳିଥିବା ସୂଚନା ଅନୁଯାୟୀ ରେଢାଖୋଲ ବ୍ଲକ୍ କଦଳୀଗଡ଼ ଗ୍ରାମ୍ ପଂଚାୟତ କନ୍ଧରା ଗ୍ରାମର ଜଗଦୀଶ ମେହେର (36) ଓ ତାଙ୍କ ସ୍ତ୍ରୀ ସୁଭଦ୍ରା ମେହେର (31) ଗୋଟିଏ ବାଇକ ଓଡି27 ଏ 5900 ଯୋଗେ ଆଜି ସନ୍ଧ୍ୟାରେ ଶ୍ୱଶୁର ଘର ତେଲିବନ୍ଧ ଅଞ୍ଚଳକୁ କୌଣସି କାମରେ ଯାଉଥିଲେ l ଜାତୀୟ ରାଜପଥ ନମ୍ବର୍ 57 ର ମଧୁପୁର ଛକ ନିକଟରେ ଓଭର ଟେକ୍ ବେଳେ ଆଗରେ ଯାଉଥିବା ଅନ୍ୟ ଗୋଟିଏ ବାଇକ ପଛରେ ତାଙ୍କ ବାଇକ ଧକ୍କା ହୋଇଥିଲା | ଫଳରେ ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହୋଇଥିଲେ l ସ୍ଥାନୀୟ ଲୋକେ ଉଦ୍ଧାର କରି 108 ଆମ୍ବୁଲାନସ୍ ଯୋଗେ ବୌଦ୍ଧ ଡାକ୍ତରଖାନା ପଠାଇଥିଲେ l ଉଭୟଙ୍କ ଅବସ୍ଥା ଗୁରୁତର ଥିବା ଜଣାପଡିଛି l
