ବାଲିଗୁଡ଼ା,୧୭/୧୨:ଟ୍ରକ ଧକ୍କାରେ ସ୍ତ୍ରୀ ମୃତ, ସ୍ୱାମୀ ସମେତ ପୁଅ ଝିଅ ଗୁରୁତର । ତୁମୁଡ଼ିବନ୍ଧ ଥାନା ବୁଦୁଲିପଦର ଘାଟିରେ ଘଟିଛି ଏହି ମର୍ମନ୍ତୁଦ ସଡ଼କ ଦୁର୍ଘଟଣା । ସମସ୍ତଙ୍କୁ ତୁମୁଡ଼ିବନ୍ଧ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି । ସେପଟେ କ୍ଷତିପୂରଣ ଓ ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ଦାବି କରି ତୁମୁଡ଼ିବନ୍ଧ ଡାକ୍ତରଖାନା ସମ୍ମୁଖ ୫୯ ନଂ ଜାତୀୟ ରାଜପଥ ଅବରୋଧ କଲେ ଅଞ୍ଚଳବାସୀ । ସୂଚନା ପ୍ରକାରେ ଆଜି ସକାଳେ କନ୍ଧମାଳ ଜିଲ୍ଲା ତୁମୁଡିବନ୍ଧ ବ୍ଲକ୍ ଲଙ୍କାଗଡ଼ ଗ୍ରାମର ଥଣ୍ଡା ପରାସେଠ୍ ନିଜ ସ୍ତ୍ରୀ ବୈଦି ପରାସେଠ୍,ପୁଅ ରାଜା ପରାସେଠ୍ ଓ ଝିଅ ମମତା ପରାସେଠ୍ ସହ ମୋଟର ସାଇକେଲରେ ବାଲିଗୁଡ଼ା ଯିବା ସମୟରେ ବୁଦୁଲିପଦର ଘାଟିରେ ଏକ ଟ୍ରକ୍ ପଛପଟୁ ଧକ୍କା ଦେଇଥିଲା । ଫଳରେ ସ୍ୱାମୀ, ସ୍ତ୍ରୀ ସମେତ ଦୁଇ ଛୁଆ ଗୁରୁତର ଆହତ ହୋଇଥିଲେ । ଖବରପାଇ ସ୍ଥାନୀୟ ଲୋକଙ୍କ ସହାୟତାରେ ୧୦୮ ଆମ୍ବୁଲାନ୍ସ ଯୋଗେ ସମସ୍ତଙ୍କୁ ତୁମୁଡ଼ିବନ୍ଧ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତିର୍ି କରାଇଥିଲା । ସେଠାରେ ବୈଦିକ ପରାସେଠଙ୍କୁ ଡାକ୍ତର ମୃତ ଘୋଷଣା କରିଥିବା ବେଳେ ବାପା ଓ ଦୁଇ ଛୁଆ ଚିକିତ୍ସିତ ହେଉଛନ୍ତି । ଖବରପାଇ ତୁମୁଡ଼ିବନ୍ଧ ପୋଲିସ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିବା ସହ ଦୁର୍ଘଟଣା ଘଟାଇ ଫେରାର ହୋଇଯାଇଥିବା ଟ୍ରକକୁ କ.ନୁଆଗାଁ ଥାନା ପୋଲିସ ଦ୍ୱାରା ଜବତ କରାଯାଇଥିବା ବେଳେ ଡ୍ରାଇଭର ସେଠାରୁ ଫେରାର ହୋଇଯାଇଥିବା ଜଣାପଡ଼ିଛି । ଅନ୍ୟପଟେ ରାସ୍ତା ରୋକ କରିଥିବା ଉତ୍ୟକ୍ତ ଲୋକଙ୍କୁ ବୁଝାସୁଝା କରୁଛି ପୋଲିସ୍ । ଦୀର୍ଘ ସମୟ ପରେ ପ୍ରଶାସନର ପ୍ରତିଶୃତି ପାଇ ଧାରଣାରୁ ଉଠିଲେ ଉତ୍ୟକ୍ତ ଲୋକେ ।
