ବାଲିଗୁଡ଼ା/ଦାରିଙ୍ଗବାଡ଼ି,୪/୯: ପାଇଖାନା ଘରୁ ଯୁବ ଇଂଜିନିୟରଙ୍କ ସନ୍ଦେହଜନକ ମୃତଦେହ ଉଦ୍ଧାର । ଏଭଳି ଘଟଣା ଦେଖିବାକୁ ମିଳିଛି କନ୍ଧମାଳ ଜିଲ୍ଲା ଦାରିଙ୍ଗବାଡ଼ି ଲୁହରା ସାହିରେ । ପୋଲିସ ଆଜି ଅପରାହ୍ନ ସମୟରେ ଏକଜିକ୍ୟୁଟିଭ ମାଜିଷ୍ଟ୍ରେଟଙ୍କ ଉପସ୍ଥିତିରେ ସନ୍ଦେହଜନକ ମୃ ଦେହ ପାଇଖାନ ଘରୁ ଉଦ୍ଧାର କରିଛନ୍ତି । ମୃତକ ନୟାଗଡ଼ ଜିଲ୍ଲା ଦଶପଲ୍ଲାର ରବୀନ୍ଦ୍ରନାଥ ବେହେରାଙ୍କ ପୁଅ ରାକେଶ କୁମାର ବେହେରା(୩୦) ହୋଇଥିବା ଜଣାପଡ଼ିଛି । ମୃତକ ଗତ କିଛି ଦିନ ହେବ ଆରକେଡି ଠିକାସଂସ୍ଥାରେ ଇଞ୍ଜିନିୟର ଭାବେ ନିର୍ମାଣ କାର୍ଯ୍ୟ କରୁଥିଲେ । ସୂଚନା ମୁତାବକ ମୃତ ରାକେଶ କୁମାର କିଛିଦିନ ହେଲା ଗାଁରୁ ଆସିଦାରିଙ୍ଗବାଡ଼ି ଲୁହୁର ସାହିରେ ଘର ଭଡ଼ା ନେଇ ରହି ଠିକା ସଂସ୍ଥାରେ ଯୋଗଦେଇ କାମ କରିଆସୁଥିଲେ । ଗତକାଲି କାମସାରି ଘରକୁ ସନ୍ଧ୍ୟା ସମୟରେ ଆସିବା ପରେ ଆଜି ସକାଳ ଯାଏ ଘରୁ ବାହାରକୁ ବାହାରି ନଥିଲେ । କୌଣସି କାରଣରୁ ଘରମାଲିକ ରାକେଶଙ୍କ ସହ କଥା ହେବା ପାଇଁ ଯାଇଥିଲେ । ହେଲେ କବାଟ ଖୋଲିନଥିଲେ କି ଉତ୍ତର ଦେଇନଥିଲେ । ଏହାର କିଛି ସମୟ ପରେ ପୁଣି ଡାକିଥିଲେ ହେଲେ ମଧ୍ୟ ଉତ୍ତର ନମିଳିବାରୁ ସାହିଲୋକ ମାନେ ଆସି ପାଟିକରି ଡାକିବାସହ କବାଟ ବାଡାଇଥିଲେ । ଏହାପରେ ଥାନା ଅଧିକାରୀଙ୍କୁ ଜଣାଇଥିଲେ । ଥାନା ଅଧିକାରୀ ଆସିବା ପରେ ପାରିପାର୍ଶ୍ୱିକ ପରିସ୍ଥିତି ଦେଖି ଏକ୍ସକ୍ୟୁଟିଭ ମାଜିଷ୍ଟ୍ରେଟଙ୍କ ତଥା ଅତିରିକ୍ତ ତହସିଲଦାର ନରେନ୍ଦ୍ର ମଲିକ ଓ ଜନ ସ୍ୱାସ୍ଥ୍ୟ ଅଧିକାରୀ ଡା.ଜାକେଶ ସାମନ୍ତରାୟଙ୍କୁ ଘଟଣାସ୍ଥଳକୁ ଡକାଇବାସହ ସମସ୍ତଙ୍କ ଉପସ୍ଥିତରେ ଘରର କବାଟ ଭାଙ୍ଗି ଘରଭିତରେ ପଶି ଦେଖିଥିଲେ । ରାକେଶ ଉଲଗ୍ନ ଅବସ୍ଥାରେ ପାଇଖାନାରେ ପଡିଥିବା ଦେଖିଥିଲେ । ହେଲେ କେଉଁ ପରିସ୍ଥିତିରେ ରାକେଶଙ୍କ ମୃତ୍ୟୁ ଘଟିଛି ତାହା ଏପର୍ଯ୍ୟନ୍ତ ଜଣାପଡ଼ିନାହିଁ । ଥାନା ଅଧିକାରୀ କୌଶିକ ମାଝୀଙ୍କ ସମେତ ସବ୍ ଇନ୍ସପେକ୍ଟର ସୌମ୍ୟରଞ୍ଜନ ଜେନା ଓ ସୌମ୍ୟକାନ୍ତ ପଣ୍ଡା ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିବାସହ ଶବ ଜବତ କରି ବ୍ୟବଚ୍ଛେଦ ପାଇଁ ଦାରିଙ୍ଗବାଡ଼ି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ପଠାଯାଇଛି । ଶବ ବ୍ୟବଚ୍ଛେଦ ପରେହିଁ ପ୍ରକୃତ ମୃତ୍ୟୁ କାରଣ ଜଣାପଡ଼ିବ ବୋଲି ଥାନା ଅଧିକାରୀ କୌଶିକ ମାଝୀ ସୂଚନା ଦେଇଛନ୍ତି ।
