ବୌଦ୍ଧ,୧/୭ – ବିଜୁ ଜନତା ଦଳର ଉପ ସଭାପତି ଭାବରେ ଦଳର ସୁପ୍ରିମୋ ନବୀନ ପଟ୍ଟନାୟକ ବୌଦ୍ଧ ବିଧାୟକ ପ୍ରଦୀପ ଅମାତଙ୍କୁ ନିଯୁକ୍ତ କରିଛନ୍ତି । ସେ ଦଳର ଉପ ସଭାପତି ଭାବେ ସଶକ୍ତ ଓଡିଶା ଦାୟିତ୍ୱରେ ରହିବେ ବୋଲି ରାଜ୍ୟ ମିଡିଆ ସେଲର ସାଧାରଣ ସମ୍ପାଦକ ମାନସ ମଙ୍ଗରାଜ ଘୋଷଣା କରିଛନ୍ତି । ଆଜି ଦଳର ବରିଷ୍ଠ ୮ ଜଣ ନେତାଙ୍କ ସହ ନୂତନ ୯ ଜଣଙ୍କୁ ମିଶାଇ ମୋଟ୍ ୧୭ ଜଣଙ୍କୁ ଦଳର ଉପ ସଭାପତି ଭାବେ ନିଯୁକ୍ତି ମିଳିଛି । ବୌଦ୍ଧ ବିଧାୟକ ଭାବରେ ଓଡିଶା ବିଧାନ ସଭାକୁ ଲଗାତର ୫ ଥର ନିର୍ବାଚିତ ହୋଇ ଓଡିଶା ବିଧାନ ସଭାର ବାଚସ୍ପତି, ଅର୍ଥମନ୍ତ୍ରୀ, ସ୍ୱାସ୍ଥ୍ୟ ମନ୍ତ୍ରୀ ଓ ଖଣି ଇସ୍ପାତ ମନ୍ତ୍ରୀ ଭାବେ ପ୍ରଦୀପ ଅମାତ୍ ପୁର୍ବରୁ ଦାୟିତ୍ୱ ତୁଲାଇ ସାରିଛନ୍ତି । ଏହି ନୂତନ ଦାୟିତ୍ୱକୁ ମଧ୍ୟ ସେ ସୁଚାରୁ ଭାବରେ ତୁଲାଇ ଓଡିଶାକୁ ସଶକ୍ତ ଓଡିଶାରେ ପରିଣତ କରିପାରିବେ ବୋଲି ଜନସାଧାରଣ ତାଙ୍କ ଉପରେ ଆଶା ରଖିଛନ୍ତି । ତାଙ୍କୁ ଏହି ନୂତନ ଦାୟିତ୍ୱ ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଦାନ କରିଥିବାରୁ ଦଳୀୟ କର୍ମୀ ମହଲରେ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଦେବାସହ ସେମାନଙ୍କ ମନରେ ଆନନ୍ଦର ଲହରୀ ଖେଳିଯାଇଛି ।
