ବୌଦ୍ଧ,୬/୧୨:- ବୌଦ୍ଧ ଥାନା ବଘିଆପଡ଼ା ଫାଣ୍ଡି ଅନ୍ତର୍ଗତ ଡିଡିଙ୍ଗାପଦର ଗ୍ରାମ୍ୟ ଜଙ୍ଗଲରୁ ଗତ ନଭେମ୍ବର ୩୦ ତାରିଖରେ ଅଜଣା ଯୁବକର ଶବ ଉଦ୍ଧାର ଘଟଣାର ପର୍ଦ୍ଦାଫାଶ କରିଛି ବୌଦ୍ଧ ପୋଲିସ । ମୃତକ ଜଣକ ମନମୁଣ୍ଡା ଥାନା ତିଲପଙ୍ଗା ଗ୍ରାମର ମଧୁ କହଁର ବୋଲି ସୂଚନା ଦେଇଛି ପୋଲିସ । ମଧୁଙ୍କୁ ହତ୍ୟା କରିଥିବା ସମସ୍ତ ୬ ଜଣ ଅପରାଧୀଙ୍କୁ ମଧ୍ୟ ଗିରଫ କରିଛି ପୋଲିସ । ହତ୍ୟାରେ ବ୍ୟବହୃତ ଛୁରୀ, ମାରୁତି କାର ସହିତ ବାଇକ୍, ମୋବାଇଲ ଫୋନ ମଧ୍ୟ ଜବତ କରିଛି ପୋଲିସ । ପୋଲିସ ଠାରୁ ମିଳିଥିବା ସୂଚନା ଅନୁଯାୟୀ ତିଲପଙ୍ଗା ଗ୍ରାମର ମଧୁ କହଁର ପେଶାରେ ଜଣେ ଚାଷୀ ହୋଇଥିବା ବେଳେ କଳାଯାଦୁ ମଧ୍ୟ କରନ୍ତି । କିଛି ଦିନ ପୂର୍ବେ ମଧୁଙ୍କ ଗ୍ରାମରେ ଜଣେ ଲୋକର ମୃତ୍ୟୁ ହୋଇଥିବା ବେଳେ ତାଙ୍କର ଦୁଇ ପୁଅ ମଧୁ କହଁର କଳାଯାଦୁ କରି ତାଙ୍କ ବାପାଙ୍କୁ ମାରିଦେଇଥିବା ନେଇ ସନ୍ଦେହ କରିଥିଲେ । ଏହାର ପ୍ରତିଶୋଧ ନେବା ପାଇଁ ଦୁଇ ଭାଇ ଅନ୍ୟ ୪ ଜଣ ଅଭିଯୁକ୍ତଙ୍କୁ ନେଇ ଗୋଟିଏ ସ୍ୱିଫ୍ଟ ଡିଜାୟାର ଗାଡ଼ିରେ ମଧୁ କହଁରଙ୍କୁ ଅପହରଣ କରିବା ସହିତ ଜଙ୍ଗଲ ମଧ୍ୟକୁ ନେଇ ଯାଇଥିଲେ ଏବଂ ସେଠାରେ ତାଙ୍କୁ ଏକ ଛୁରୀରେ ବେକ କାଟି ହତ୍ୟା କରିଥିଲେ । ହତ୍ୟା କରି ସେଠାରେ ଶବ ଫିଙ୍ଗିଦେଇ ଫେରାର ମାରିଥିଲେ । ତେବେ ଆଜି ଏହି ହତ୍ୟା ଘଟଣାର ପ୍ରକୃତ ସତ୍ୟ ପୋଲିସ ସାମ୍ନାକୁ ଆଣିଥିବା ବେଳେ ହତ୍ୟାରେ ସାମିଲ ସମସ୍ତ ଅଭିଯୁକ୍ତଙ୍କୁ ଗିରଫ କରିଛି ଏବଂ ହତ୍ୟାରେ ବ୍ୟବହୃତ ସାମଗ୍ରୀ ଜବତ କରିଛି । ଆଜି ବୌଦ୍ଧ ଆଦର୍ଶ ଥାନାରେ ଆରକ୍ଷୀ ଅଧିକ୍ଷକ ରାଜ ପ୍ରସାଦ ଏକ ସାମ୍ବାଦିକ ସମ୍ମିଳନୀରେ ଏହି ହତ୍ୟାକାଣ୍ଡ ସଂପର୍କରେ ସବିଶେଷ ସୂଚନା ପ୍ରଦାନ କରିଥିଲେ ।
