ବୌଦ୍ଧ,୨୮/୮:- ବୌଦ୍ଧ ଥାନା ଦେବଗଡ ଗ୍ରାମରେ ଆଜି ଅପରାହ୍ନ ସମୟରେ ଏକ ଅଘଟଣ ଘଟିଯାଇଛି । ବାଡି ପଟରେ ଥିବା କୂଅକୁ ଗାଧୋଇବାକୁ ଯାଇଥିବାବେଳେ କୂଅରେ ଖସିପଡି ଜନୈକ ବ୍ୟକ୍ତିଙ୍କ ମୃତ୍ୟୁ ହୋଇ ଯାଇଥିବା ସୂଚନା ମିଳିଛି । ମିଳିଥିବା ସୂଚନା ଅନୁଯାୟୀ ଦେବଗଡ ଗ୍ରାମର ବିଭୁଧେନ୍ଦ୍ର ମାଝୀ (୫୦ ବର୍ଷ) ଆଜି ଦିନ ପ୍ରାୟ ୨ ଘଣ୍ଟା ସମୟରେ କୂଅକୁ ଗାଧୋଇବାକୁ ଯାଇ କୂଅରୁ ପାଣି କାଢିବା ସମୟରେ ଅସାବଧାନତା ବଶତଃ କୂଅ ଭିତରେ ଖସି ପଡିଥିଲେ । ଏହା ଜାଣିବା ପରେ ପରିବାର ଓ ପାଖ ପଡୋଶୀ ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର କରି ବୌଦ୍ଧ ଡାକ୍ତରଖାନାକୁ ଆଣିଥିଲେ । ବୌଦ୍ଧ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଯାଇଛି । ଖବର ପାଇ ବୌଦ୍ଧ ଥାନା ପୋଲିସ୍ ଡାକ୍ତରଖାନାରେ ପହଞ୍ଚି ମୃତଦେହକୁ ଜବତ କରିଛି । ଆସନ୍ତାକାଲି ମୃତଦେହକୁ ବ୍ୟବଚ୍ଛେଦ କରାଯିବା ପରେ ପରିବାର ବର୍ଗଙ୍କୁ ହସ୍ତାନ୍ତର କରାଯିବ ବୋଲି ସୂଚନା ମିଳିଛି । ମୃତ ବିଭୁଧେନ୍ଦ୍ର ଦେବଗଡ ରାମଲୀଳା ପାର୍ଟିର ଜଣେ ପ୍ରତିଭାବାନ କଳାକାର ଥିଲେ । ତାଙ୍କର ମୃତ୍ୟୁରେ ଦେବଗଡ ଗ୍ରାମ ସମେତ ଆଖପାଖ ଗ୍ରାମରେ ଶୋକର ଛାୟା ଖେଳିଯାଇଛି ।
