ବୌଦ୍ଧ /ବାଉଁଶୁଣୀ,୧୫/୩- ବାଉଁଶୁଣୀ ଥାନା ବହିରା ଗ୍ରାମ କେନାଲ ତଳ ପଟାସ୍ ଗଛରୁ ଗତ ୧୩ ତାରିଖରେ ଗୁଡପଡା ଗ୍ରାମର ଜୟରାମ ବନଛୋର (୨୦)ଙ୍କ ମୃତଦେହ ପ୍ଲାଷ୍ଟିକ ଦଉଡିରେ ମିଳିବା ଘଟଣା ଏବେ ନୂଆମୋଡ ନେଇଛି । ମୃତକ ଜୟରାମର ପିତା ବିନୟ ବନଛୋର ତାଙ୍କ ପୁଅକୁ ହତ୍ୟା କରାଯାଇଥିବା ବାଉଁଶୁଣୀ ଥାନାରେ ଲିଖିତ ଅଭିଯୋଗ କରିଛନ୍ତି । ତାଙ୍କ ଅଭିଯୋଗକୁ ବାଉଁଶୁୀଣୀ ପୋଲିସ ଗ୍ରହଣ ନକରିବାରୁ ସେ ଉପରିସ୍ଥ ଅଧିକାରୀଙ୍କ ନିକଟରେ ଅଭିଯୋଗ କଲାପରେ ଗ୍ରହଣ କରିଥିବା ଜଣାପଡିଛି । ବିନୟଙ୍କ ଅଭିଯୋଗ ଅନୁଯାୟୀ ୧୨ ତାରିଖ ସନ୍ଧ୍ୟା ୫ ଘଣ୍ଟା ସମୟରେ ଜୟରାମର ମୋବାଇଲରୁ ତା ମଝିଆ ଭାଇ ଶ୍ରୀରାମ ବନଛୋର ମୋବାଇଲ୍କୁ ଏକ କଲ୍ ଆସିଥିଲା । ଝାରକଟା ଗ୍ରାମର ଜଣେବ୍ୟକ୍ତି ତାଙ୍କ ପାଖରେ ଜୟରାମର ମୋବାଇଲ ଅଛି ଓ ଆସି ନେଇଯିବାକୁ କହିଥିଲେ । ସେହିପରି ୧୩ ତାରିଖ ସକାଳ ୬ ଘଣ୍ଟା ସମୟରେ ଜୟରାମ ଚଳାଉଥିବା ଟ୍ରାକ୍ଟରର ମାଲିକ ବହିରା ଗ୍ରାମର ସଂଜୀବ ମେହେର ଜୟରାମ ମୋବାଇଲକୁ ଫୋନ୍ କରିଥିଲେ । ଜୟରାମ ବଦଳରେ ବହିରା ଗ୍ରାମର ଅନ୍ୟଜଣେ ବ୍ୟକ୍ତି ଉଠାଇଥିଲେ ଓ ସେ ଜୟରାମକୁ ଦେଖିନଥିବା କହିଥିଲେ । ବିନୟଙ୍କ ଅଭିଯୋଗ ଅନୁଯାୟୀ ତାଙ୍କ ପୁଅକୁ ମିଶାଇ ୪ ଜଣ ୧୨ ତାରିଖ ସନ୍ଧ୍ୟାରେ ଭୋଜି କରିଥିଲେ ଓ କୌଣସି କାରଣରୁ ତାଙ୍କ ପୁଅକୁ ଏମାନେ ମିଶି ହତ୍ୟାକରି ଆତ୍ମହତ୍ୟାର ରୂପ ଦେଇଥିବା ଲିଖିତ ଭାବରେ ବାଉଁଶୁଣୀ ପୋଲିସ ପାଖରେ ଏତାଲା ଦେଇଛନ୍ତି । ଅଭିଯୋଗ ପାଇବା ପରେ ମଧ୍ୟ ବାଉଁଶୁଣୀ ପୋଲିସ କୌଣସି ତଦନ୍ତ କିମ୍ବା କାର୍ଯ୍ୟାନୁଷ୍ଠାନ ନେଉନଥିବା ପରିବାର ଲୋକେ ଅଭିଯୋଗ କରିଛନ୍ତି ।
