ବୌଦ୍ଧ,୨/୧୦- ଆଜି ସନ୍ଧ୍ୟାରେ ବୌଦ୍ଧ-କିଆକଟା ମହାନଦୀ ପୋଲ ଉପରେ ଏକ ମର୍ମନ୍ତୁଦ ସଡକ ଦୁର୍ଘଟଣାରେ ଜଣଙ୍କର ମୃତ୍ୟୁ ହୋଇଥିବାବେଳେ ଆଉଜଣେ ନିଖୋଜ ଥିବା ଜଣାପଡିଛି । ପ୍ରାପ୍ତ ସୂଚନା ଅନୁସାରେ ଆଜି ସନ୍ଧ୍ୟାରେ ଡିଏଲ୍୮ସିଏଲ୬୫୯୨ନଂ ବିଶିଷ୍ଟ ଏକ କାର୍ ବୌଦ୍ଧପଟୁ କିଆକଟା ଆଡକୁ ଯାଉଥିବାବେଳେ ବିପରୀତ ଦିଗରୁ ଆସୁଥିବା ଓଆର୧୯ଏ୬୭୨୯ ନଂ ବିଶିଷ୍ଟ ଏକ ବାଇକ ସହିତ ମୁହାଁମୁହିଁ ଧକ୍କା ହୋଇଥିଲା । ବାଇକ ଆରୋହୀ ଆଠମଲ୍ଲିକ ଥାନା ଅନ୍ତର୍ଗତ ଛେପରା ଗ୍ରାମର ଟୁନା ବାରିକଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିବାବେଳେ ବାଇକରେ ବସିଥିବା ଆଠମଲ୍ଲିକ ଥାନା ଅନ୍ତର୍ଗତ କଂପଲା ଗ୍ରାମର ମହିଳା ପ୍ରତିମା ସାହୁ (୪୧) ନିଖୋଜ ଥିବା ଜଣାପଡିଛି । ଧକ୍କା ହେବାପରେ ବାଇକଟି ଅନେକବାଟ ଘୋଷାଡିହୋଇ ଯାଇଥବା ଯୋଗୁଁ ନିଖୋଜ ମହିଳା ଜଣକ ସେତୁ ଉପରୁ ମହାନଦୀ ମଧ୍ୟକୁ ଛିଟିକି ପଡିଥିବା ସନ୍ଦେହ କରାଯାଉଛି । ଖବରପାଇ ବୌଦ୍ଧ ଅଗ୍ନିଶମ ବିଭାଗ ତରଫରୁ ନିଖୋଜ ମହିଳାଙ୍କୁ ଖୋଜାଖୋଜି କରୁଥିବାବେଳେ ବୌଦ୍ଧ ପୁଲିସ ଘଟଣାର ତଦନ୍ତ କରୁଛି । ଘଟଣାସ୍ଥଳରେ ଉପଜିଲ୍ଲାପାଳ ଅଶ୍ୱିନୀ କୁମାର ମେହେର ପହଞ୍ଚି ପରିସ୍ଥିତି ଅନୁଧ୍ୟାନ କରିଛନ୍ତି ।
