ବାଉଁଶୁଣି,୨/୫- ବୌଦ୍ଧବ୍ଲକ ଆମ୍ବଝରି ପଞ୍ଚାୟତର ଗୋଛାପଡା ଗ୍ରାମର ରବି ବାଘଙ୍କ ଘରେ ଶନିବାର ଅଗ୍ନିକାଣ୍ଡ ଘଟି ୬ବଖରା ଘର ଜଳିଯିବା ଯୋଗୁଁ ଏହି ପରିବାର ସର୍ବସ୍ୱ ହରାଇଥିଲେ । ଅଗ୍ନି ବିପନ୍ନ ପରିବାରକୁ ଆଜି ସତ୍ୟସାଇ ସେବା ସଙ୍ଗଠନ ବୌଦ୍ଧ ପକ୍ଷରୁ ରିଲିଫ ସାମଗ୍ରୀ ଯୋଗାଇ ଦିଆଯାଇଛି । ସଙ୍ଗଠନର ଜିଲ୍ଲା ସଭାପତି ଡା. ପ୍ରିୟବ୍ରତ ବେହେରାଙ୍କ ନେତୃତ୍ୱରେ ଅନ୍ୟାନ୍ୟ କର୍ମକର୍ତ୍ତା ରବି ବାଘଙ୍କ ଘରେ ପହଞ୍ଚି ‘ଅମୃତ କଳସ’ ଆକାରରେ ୨୫ କିଲୋ ଚାଉଳ, ଡାଲି, ଚୁଡ଼ା, ଚିନି, ତେଲ ମସଲା ଏବଂ ମାସକ ପାଇଁ ସମସ୍ତ ତେଜରାତି ସାମଗ୍ରୀ, ବାସନ କୁସନ, ରନ୍ଧନ ସାମଗ୍ରୀ, ପିନ୍ଧିବା ପାଇଁ ନୂଆଲୁଗା ଓ ପିଲାମାନଙ୍କ ଡ୍ରେସ ସହ ପାଠପଢ଼ା ସାମଗ୍ରୀ ଆଦି ଯୋଗାଇ ଦେଇଛନ୍ତି । ଏଥିରେ ଶତ୍ରୁଘ୍ନ ପଢ଼ିଆରୀ, ଧିରଜ ଲୌରିଆ, ନାରାୟଣ ମିଶ୍ର ପ୍ରମୁଖ ସହଯୋଗ କରିଥିଲେ । ବିପଦ ସମୟରେ ଅଗ୍ନିବିପନ୍ନ ପରିବାରକୁ ସାହାଯ୍ୟ କରିଥିବାରୁ ସତ୍ୟସାଇ ସେବା ସଙ୍ଗଠନକୁ ସ୍ଥାନୀୟ ଅଞ୍ଚଳରେ ପ୍ରଶଂସା କରାଯାଇଛି ।
