ବୌଦ୍ଧ : ବୌଦ୍ଧ ତହସିଲର ନୂତନ କାର୍ଯ୍ୟାଳୟ ପାଇଁ ସ୍ଥାନ ଚିହ୍ନଟ କରାଯାଇଛି । ସମସ୍ତ ସରକାରୀ ଓ ବେସରକାରୀ ଅନୁଷ୍ଠାନର କାର୍ଯ୍ୟାଳୟ ସ୍ଥାପନ ପାଇଁ ସ୍ଥାନ ଯୋଗାଇଦେଉଥିବା ତହସିଲ କାର୍ଯ୍ୟାଳୟରେ ସ୍ଥାନାଭାବ ଦେଖାଯିବା ସହିତ ବିକ୍ଷିପ୍ତ ଭାବରେ ସମସ୍ତ କର୍ମଚାରୀ କାର୍ଯ୍ୟ କରୁଛନ୍ତି ଓ ଫଳରେ ତହସିଲ କାର୍ଯ୍ୟାଳୟକୁ ବିଭିନ୍ନ କାର୍ଯ୍ୟରେ ଆସୁଥିବା ଲୋକମାନେ ମଧ୍ୟ ହଇରାଣ ହେବାକୁ ପଡୁଛି ବୋଲି କୁହାଯାଉଛି । ଗୋଟିଏ ପଟେ ବର୍ତ୍ତମାନର ତହସିଲ କାର୍ଯ୍ୟାଳୟ ଜିଲା ସଂଗ୍ରହାଳୟ ନିକଟରେ କାର୍ଯ୍ୟ କରୁଥିବାବେଳେ ସଂଗ୍ରହାଳୟ ସଂପ୍ରସାରଣ ପାଇଁ ମଧ୍ୟ ଅଧିକ ସ୍ଥାନର ଆବଶ୍ୟକତା ରହିଥିଲା । ତେଣୁ ନୂତନ ସ୍ଥାନକୁ ତହସିଲ କାର୍ଯ୍ୟାଳୟ ସ୍ଥାନାନ୍ତର ହୋଇଗଲେ ସଂଗ୍ରହାଳୟ ପରିସରକୁ ମଧ୍ୟ ନୂତନ ରୂପ ଦିଆଯାଇପାରିବ ବୋଲି ପ୍ରେସ ବିବୃତିରେ ଦର୍ଶାଯାଇଛି । ତହସିଲଦାର ଅବିନାଶ ପାଣ୍ଡିଆ ଦାୟିତ୍ୱ ଗ୍ରହଣ କରିବାପରେ ନୂତନ ତହସିଲ କାର୍ଯ୍ୟାଳୟ ପାଇଁ ମାଉସୀ ମା ମନ୍ଦିର ନିକଟରେ ସ୍ଥାନ ଚିହ୍ନଟ କରାଯାଇଛି । ପ୍ରାସ୍ତବିତ ନୂତନ କାର୍ଯ୍ୟାଳୟ ପାଇଁ ସ୍ଥାନ ଚିହ୍ନଟ ହୋଇଥିବା ବେଳେ ଅପରପକ୍ଷରେ ବର୍ତ୍ତମାନ କାର୍ଯ୍ୟ କରୁଥିବା ତହସିଲ ଅଫିସକୁ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଇ ଏକ ନୂତନ ରୂପ ଦିଆଯାଉଛି ।
