ସିମନବାଡ଼ିରେ ଜିଲ୍ଲାସ୍ତରୀୟ ଫୁଟବଲ ଟୁର୍ଣ୍ଣାମେଣ୍ଟ ଉଦଘାଟିତ: ଗସୁକିଆ ଦଳ ୩-୧ ଗୋଲରେ ଦାରିଙ୍ଗବାଡିକୁ ହରାଇ ବିଜୟୀ
ଦାରିଙ୍ଗବାଡି,୧୯/୮: ଦାରିଙ୍ଗବାଡି ବ୍ଲକ ସିମନବାଡି ଗୋଷ୍ଠୀ ଖେଳ ପଡିଆ ଠାରେ ଆଜି ଜିଲ୍ଲାସ୍ତରୀୟ ଫୁଟବଲ ଟୁର୍ଣ୍ଣାମେଣ୍ଟ୍ ଉଦଘାଟିତ ହୋଇଯାଇଛି । ଜି.ଉଦୟଗିରି ବିଧାୟକ ସାଲୁଗା ପ୍ରଧାନ ମୁଖ୍ୟଅତିଥି ଭାବେ ଯୋଗ ଦେଇ ବଲଟିକୁ ସଟ ମାରି ଟୁର୍ଣ୍ଣାମେଣ୍ଟ ର ଉଦଘାଟନ କରିଥିଲେ । ଅନ୍ୟମାନଙ୍କ ମଧ୍ୟରେ ସମ୍ମାନିତ ଅତିଥି ଭାବେ ଦାରିଙ୍ଗବାଡି ବନାଞ୍ଚଳ ଅଧିକାରୀ ସତୀଶ କୁମାର ଧାରୁଆ, ସିମନବାଡି ସରପଞ୍ଚ ପ୍ରତିନିଧି ପରମେ ପ୍ରଧାନ, ବିଧାୟକ ପ୍ରତିନିଧି ଦୀପକ ସାହୁ ପ୍ରମୁଖ ଯୋଗ ଦେଇଥିଲେ । ଏହି ଟୁର୍ଣ୍ଣାମେଣ୍ଟରେ ଜିଲ୍ଲାର ୧୬ ଗୋଟି ଟିମକୁ ନେଇ ମ୍ୟାଚ ଆୟୋଜନ ହୋଇଛି । ପ୍ରଥମଦିନର ପ୍ରଥମ ମ୍ୟାଚରେ ଦାରିଙ୍ଗବାଡି ଓ ଗସୁକିଆ ଦଳ ମଧ୍ୟରେ ଖେଳ ହୋଇଥିଲା । ଏହି ମ୍ୟାଚରେ ଦାରିଙ୍ଗବାଡି ଗୋଟିଏ ଗୋଲ କରିଥିବା ବେଳେ ବିପକ୍ଷଦଳ ଗସୁକିଆ ୩ଟି ଗୋଲ କରି ବିଜୟ ହାସଲ କରିଥିଲା । ଦ୍ୱିତୀୟ ମ୍ୟାଚରେ ରାଇକିଆ ଓ ନୂଆଗାଁ ମଧ୍ୟରେ ମ୍ୟାଚ ରହିଥିବା ବେଳେ ରାଇକିଆ ଟିମ ନ ଆସିବାରୁ ନୂଆଗାଁ ଟିମକୁ ବିଜୟ(ବାଇ) ଘୋଷଣା କରାଯାଇଥିଲା । ଏହି ମ୍ୟାଚ ୧୦ ଦିନ ଧରି ଚାଲୁ ରହିବା ନେଇ କମିଟି ସୂଚନା ଦେଇ ଥିବାବେଳେ ୨୯ ତାରିଖ ଦିନ ଟୁର୍ଣ୍ଣାମେଣ୍ଟ୍ ଉଦଯାପିତ ହେବା ନେଇ କମିଟି ପକ୍ଷରୁ ସୂଚନା ଦିଆଯାଇଛି । ମୁଖ୍ୟ ରେଫରି ସୁନୀଲ କୁମାର ବେହେରା, ଲାଇନମ୍ୟାନ ଉଦିଅ ଶଙ୍କର କହଁର,ସମ୍ଭୁ ପ୍ରସାଦ ମଲିକ ଓ ସ୍କରର ସୁଜିତ ରଞ୍ଜନ ହଂସଦା ଖେଳକୁ ପରିଚାଳନା କରିଥିଲେ । ଟୁର୍ଣ୍ଣାମେଣ୍ଟ୍ କୁ କମିଟିର କର୍ମକର୍ତ୍ତା ଜଗନ୍ନାଥ ନାୟକ,ପ୍ରଭାସ ସାହୁ,ଅମର ନାୟକ(ତୋଫାନ),ମାଥ୍ୟାସ ପ୍ରଧାନ, ପିଇଟି ଶିକ୍ଷକ ସାମନ୍ତ ପ୍ରଧାନ,ହୃଷୀକେଶ ବେହେରା,ବୁନୁ ନାୟକ,ଜହନ ନାୟକ,ସିଦ୍ଧାନ୍ତ ପ୍ରଧାନ,ପିନସ ପ୍ରଧାନ, ପ୍ରମୁଖ ମ୍ୟାଚ ପରିଚାଳନାରେ ସହଯୋଗ କରିଛନ୍ତି ।
