ଦାରିଙ୍ଗବାଡ଼ି,୧/୯: ଦାରିଙ୍ଗବାଡ଼ି ଥାନା ଅନ୍ତର୍ଗତ ବଜାର ସାହି ୫୯ ନମ୍ବର ଜାତୀୟ ରାଜପଥ ପାଶ୍ୱର୍ରେ ଥିବା ଭାରତ ଗ୍ୟାସ ଛକ ନିକଟରେ ଏକ ଅଜଣା ଗାଡି ଧକ୍କାରେ ଜଣେ ବ୍ୟକ୍ତି ଗୁରୁତର ହୋଇଛନ୍ତି । ଗୁରୁତର ବ୍ୟକ୍ତି ଜଣକ ହେଲେ ବୁର୍ଜୁବାଡ଼ି ସାହିର ସିମନ ପ୍ରଧାନ(୫୨) । ସେ ଗୁରୁତର ହୋଇ ରାସ୍ତା ଉପରେ ପଡିଥିବା ଲୋକମାନେ ଦେଖି ଅଗ୍ନିଶମ ବିଭାଗକୁ ଖବର ଦେଇଥିଲେ । ଖବର ପାଇ ଅଗ୍ନିଶମ ବିଭାଗ କର୍ମଚାରୀ ଆହତ ସିମନ ପ୍ରଧାନଙ୍କୁ ଦାରିଙ୍ଗବାଡ଼ିଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ପହଞ୍ଚାଇଥିଲେ । ପ୍ରାଥମିକ ଚିକିତ୍ସା ପରେ ଗୁରୁତର ହୋଇଥିବାରୁ ଡାକ୍ତର ତାଙ୍କୁ ବ୍ରହ୍ମପୁର ବଡ଼ ମେଡ଼ିକାଲକୁ ରେଫର କରିଥିବା ଜଣାପଡ଼ିଛି । ମିଳିଥିବା ସୂଚନା ପ୍ରକାରେ ସିମନ ପ୍ରଧାନ ଗତକାଲି ସନ୍ଧ୍ୟା ପ୍ରାୟ ସାଢେ ୭ଟା ସମୟରେ ବ୍ୟକ୍ତିଗତ କାମରେ ଡବେରୀ ଯାଇ ଘରକୁ ଫେରୁଥିଲେ । ଏହି ସମୟରେ ଏକ ବୋଲେର କାର ସୋରଡା ଅଞ୍ଚଳରୁ ୫୯ ନମ୍ବର ଜାତୀୟ ରାଜପଥରେ ଦାରିଙ୍ଗବାଡ଼ିକୁ ଆସୁଥିବା ବେଳେ ସିମନକୁ ପଛପଟୁ ଧକ୍କାଦେଇ ପଳାଇ ଯାଇଥିଲା । ଦାରିଙ୍ଗବାଡ଼ି ପୋଲିସ ଦୁର୍ଘଟଣା ଘଟାଇଥିବା ଗାଡିକୁ ଚିହ୍ନଟ କରିବା ପାଇଁ ତଦନ୍ତ କରୁଥିବା ଜଣାପଡ଼ିଛି ।
