ଦଶପଲ୍ଲା,୮/୧:- ଆଜି ନୟାଗଡ ପୋଲିସ ପଡିଆରେ ନୟାଗଡ ଜିଲ୍ଲାର ୪ ଜଣ ବିଧାୟକଙ୍କ ନେତୃତ୍ୱରେ ବିଧାୟକ ଏକାଦଶଙ୍କ ମଧ୍ୟରେ ଫୁଟବଲ ଟୁର୍ଣ୍ଣାମେଣ୍ଟ ଅନୁଷ୍ଠିତ ହୋଇଯାଇଛି । ନୟାଗଡ ବିଧାୟକ ଡ. ଅରୁଣ କୁମାର ସାହୁ, ଖଣ୍ଡପଡ଼ା ବିଧାୟକ ସୌମ୍ୟରଞ୍ଜନ ପଟ୍ଟନାୟକ, ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରା ଓ ରଣପୁର ବିଧାୟକ ସତ୍ୟ ନାରାୟଣ ପ୍ରଧାନ ନେତୃତ୍ୱରେ ଗଠିତ ଟିମକୁ ନେଇ ଏହି ମ୍ୟାଚ ଅନୁଷ୍ଠିତ ହୋଇଥିଲା । ପ୍ରଥମ ମ୍ୟାଚ ନୟାଗଡ ବିଧାୟକ ଏକାଦଶ ଓ ଖଣ୍ଡପଡା ବିଧାୟକ ଏକାଦଶ ମ୍ୟାଚ ଅନୁଷ୍ଠିତ ହୋଇଥିଲା । ଏହି ମ୍ୟାଚରେ ଖଣ୍ଡପଡା ବିଧାୟକଙ୍କ ଦଳ ଶୋଚନୀୟ ଭାବେ ପରାଜିତ ହୋଇଥିଲେ । ନୟାଗଡ ବିଧାୟକ ଡ. ସାହୁ ପ୍ରଥମେ ଗୋଲ ଦେଇ ଖାତା ଖୋଲିଥିବା ବେଳେ ନୟାଗଡ଼ ଦଳ ୩-୦ ଗୋଲରେ ବିଜୟଲାଭ କରିଥିଲା । ଦ୍ୱିତୀୟ ମ୍ୟାଚ ଦଶପଲ୍ଲା ବିଧାୟକ ଏକାଦଶ ଓ ରଣପୁର ବିଧାୟକ ଏକାଦଶ ମଧ୍ୟରେ ଅନୁଷ୍ଠିତ ହୋଇଥିଲା । ଏହି ମ୍ୟାଚ ସଂଘର୍ଷପୂର୍ଣ୍ଣ ଥିଲା । ୧ / ୧ ରେ ମ୍ୟଚ ଡ୍ର ପରେ ଟ୍ରାଇବ୍ରେକର ସହାୟତା ନିଆଯାଇଥିଲା । ଏଥିରେ ଦଶପଲ୍ଲା ଦଳ ବିଜୟ ଲାଭ କରିବା ସହ ଫାଇନାଲରେ ନୟାଗଡକୁ ବିଧାୟକ ଏକାଦଶକୁ ସାମ୍ନା କରିଥିଲା । ନୟାଗଡ ବିଧାୟକ ଏକାଦଶ ଓ ଦଶପଲ୍ଲା ବିଧାୟକ ଏକାଦଶ ଫାଇନାଲ ମ୍ୟାଚରେ ନୟାଗଡ ବିଧାୟକ ଏକାଦଶ ୧-୦ ଗୋଲରେ ବିଜୟ ଲାଭ କରି ଚମ୍ପିୟାନ ହୋଇଥିବାବେଳେ ଦଶପଲ୍ଲା ବିଧାୟକ ଏକାଦଶ ରନର୍ସ ଅପ୍ ହୋଇଥିଲେ । ଏହି ମ୍ୟାଚ ଗୁଡିକରେ ଡ଼ ଅରୁଣ କୁମାର ସାହୁ ଚିତ୍ତାକର୍ଷକ ଖେଳ ପ୍ରଦର୍ଶନ କରି ଦର୍ଶକଙ୍କ ମନ ମୋହିଥିଲେ ।ଏହି ମ୍ୟାଚକୁ ଜିଲ୍ଲା ଆରକ୍ଷୀ ଅଧିକ୍ଷକ ଅଲେଖ ଚନ୍ଦ୍ର ପହି, ଜିଲ୍ଲା ପରିଷଦ ଉନ୍ନୟନ ଅଧିକାରୀ ସୁବାଷ ଚନ୍ଦ୍ର ରାୟ, ନୟାଗଡ ପୈାର ପରିଷଦ ନିର୍ବାହୀ ଅଧିକାରୀ ସ୍ୱାତୀ ମିଶ୍ର, ପୈାର ପରିଷଦ ଅଧ୍ୟକ୍ଷା ନିରୂପମା ଖଟେଇ, ଉପାଧ୍ୟକ୍ଷ ଗୁରୁପ୍ରସାଦ ଜେନା ପ୍ରମୁଖ ଉଦଘାଟନ କରିଥିଲେ । ସମସ୍ତ ଦଳକୁ ଟ୍ରଫି ପ୍ରଦାନ କରାଯାଇଥିଲା ।
