ଦଶପଲ୍ଲା,୨୫/୧୨ : – ଖୋର୍ଦ୍ଧା – ବଲାଙ୍ଗୀର ୫୭ ନମ୍ବର ଜାତୀୟ ରାଜପଥର ସ୍ଥାନୀୟ ପଥରପୁଞ୍ଜାଠାରେ ଗତକାଲିରାତି ପ୍ରାୟ ୮ଟା ୩୦ ମିନିଟ୍ ସମୟରେ ଏକ ଅଜଣା ଗାଡ଼ି ଧକ୍କାରେ ଜଣେ ବାଇକ୍ ଚାଳକଙ୍କ ମୃତ୍ୟୁ ହୋଇଛି । ମୃତ ବ୍ୟକ୍ତି ଜଣକ ବାଣୀଗୋଛା ଥାନା ଅଧୀନସ୍ଥ ଜାମୁସାହି ଗ୍ରାମର ବୀରେନ୍ଦ୍ର କୁମାର ସାହୁ ( ଛବି ) ୪୦ ବର୍ଷ , ବୋଲି ଜଣାପଡ଼ିଛି । ସ୍ଥାନୀୟ ଲୋକଙ୍କ କହିବା ଅନୁଯାୟୀ , ବୀରେନ୍ଦ୍ର ଦଶପଲ୍ଲାରୁ କାମ ସାରି ଘରକୁ ଫେରୁଥିବା ସମୟରେ ଦଶପଲ୍ଲା ଅଭିମୁଖେ ଆସୁଥିବା ଏକ ମିନିଟ୍ରକ୍ ତାଙ୍କୁ ଧକ୍କା ଦେଇଥିଲା । ଘଟଣାସ୍ଥଳରେ ସେ ଗୁରୁତର ହୋଇ ପଡ଼ିଥିବାବେଳେ ଗାଡ଼ିଟି ଫେରାର୍ ହୋଇଯାଇଥିଲା । ତାଙ୍କୁ ଉଦ୍ଧାର କରାଯାଇ ଦଶପଲ୍ଲା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଅଣାଯାଇଥିଲା । ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ବାଇକ୍ ସହ ମୃତଦେହକୁ ଜବତ କରି ଘଟଣାର ତଦନ୍ତ ଚଳାଇଛି । ସ୍ୱର୍ଗତ ସାହୁ ଦଶପଲ୍ଲା ଅଂଚଳର ଜଣେ ମିଷ୍ଟଭାଷୀ, ପରୋପକାରୀ,ଲୋକପ୍ରିୟ ତଥା ଜଣେ ଭଲ ରୋଷେୟା ହୋଇଥିବାରୁ ତାଙ୍କ ମୃତ୍ୟୁରେ ଦଶପଲ୍ଲା ପଶ୍ଚିମାଞ୍ଚଳରେ ଶୋକରଛାୟା ଖେଳିଯାଇଛି । ପ୍ରାପ୍ତ ସୂଚନା ଅନୁସାରେ ଆଜି ସକାଳ ୮ ଘଟିକା ସମୟରେ ସ୍ୱର୍ଗତ ସାହୁଙ୍କର ମୃତ ଶରୀରର ପୋଷ୍ଟ ମର୍ଟମ୍ ପରେ ପରିବାରକୁ ହସ୍ତାନ୍ତର କରାଯାଇଛି ।
