ବୌଦ୍ଧ : ଆଜି ସଂଧ୍ୟା ପ୍ରାୟ ୬ଘଣ୍ଟା ସମୟରେ ବୌଦ୍ଧ ବ୍ଲକ ଅଂଚଳରେ କୁଆପଥର ବୃଷ୍ଟି ଓ ଜୋରରେ ପବନ ବହିବା ଯୋଗୁଁ ବ୍ୟାପକ କ୍ଷୟକ୍ଷତି ହୋଇଥିବା ସୂଚନା ମିଳିଛି । ଅନେକ ସ୍ଥାନରେ ବଡବଡ ଆକାରର କୁଆପଥ ପଡିବା ଯୋଗୁଁ ଆଜବେଷ୍ଟସ, ଟାଇଲ ଓ ଖପର ଛାତ ଗୁଡିକ ଭାଙ୍ଗି ଯାଇଥିବା ଦେଖିବାକୁ ମିଳିଥିଲା । ତୀବ୍ର ବେଗରେ ପବନ ଓ ବର୍ଷା ଯୋଗୁଁ ଅନେକ ଘରର ଚାଳଛପର ମଧ୍ୟ ଉଡିଯାଇଛି । ବିଶେଷକରି ବୌଦ୍ଧ ବ୍ଲକର ଖୁଣ୍ଟବନ୍ଧ, ମୁଣ୍ଡାପଡା, ତେଲିବନ୍ଧ ଓ ବାଉଁଶୁଣୀ ରାଜସ୍ୱ ସର୍କଲ ଅଂଚଳରେ ବହୁଳ ପରିମାଣରେ କୁଆପଥ ବୃଷ୍ଟି ଓ ବାତ୍ୟାର ତାଣ୍ଡବ ଲୀଳା ଦେଖିବାକୁ ମିଳିଛି । ସାମାନ୍ୟ ଧରଣର ବର୍ଷା ହେବା ଫଳରେ ଲୋକେ ପ୍ରଚଣ୍ଡ ଗ୍ରୀଷ୍ମପ୍ରବାହରୁ ଟିକିଏ ଆଶ୍ୱସ୍ତି ଲାଭ କରିଥିବା ବେଳେ କ୍ଷୟକ୍ଷତି ଲୋକଙ୍କ ଦୁଃଖକୁ ବଢାଇ ଦେଇଛି । ସେହିପରି ପନିପରିବା ଚାଷ ଓ ରବି ଫସଲ ମଧ୍ୟ ବହୁତ କ୍ଷତି ହୋଇଥିବା ଜଣାପଡିଛି ।
