ବୌଦ୍ଧ : ଆଜି ଅପରାହ୍ନରେ ବଜ୍ରାଘାତ ଯୋଗୁଁ ଜଣେ ବାଳକର ମୃତ୍ୟୁ ହୋଇଥିବା ବେଳେ ଜଣେ ବାଳିକା ଗୁରୁତର ଭାବେ ଆହତ ହୋଇ କଣ୍ଟାମାଳ ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ମିଳିଥିବା ସୂଚନା ଅନୁସାରେ କଣ୍ଟାମାଳ ଥାନା ବରଗାଁ ଗ୍ରାମ ପଞ୍ଚାୟତ ସେଲମାପାଲି ଗ୍ରାମର ସଂପର୍କୀୟ ଦୁଇଭାଇଭଉଣୀ ଗୁରୁଦେବ ସେଲମା ଓ ଅଞ୍ଜଳୀ ସେଲମା ଖଜୁରୀ କୋଳି ଖାଇବାକୁ ଯାଇଥିଲେ । ଏହି ସମୟରେ ବଜ୍ରାଘାତ ହେବାରୁ ଉଭୟ ଗୁରୁଦେବ ଓ ଅଞ୍ଜଳୀ ବଜ୍ରାଘାତର ଶିକାର ହୋଇଥିଲେ । ଘଟଣାସ୍ଥଳରେ ନାବାଳକ ଗୁରୁଦେବର ମୃତ୍ୟୁ ହୋଇଥିବା ବେଳେ ନାବାଳିକା ଅଞ୍ଜଳୀ ଗୁରୁତର ଆହତ ହୋଇଥିଲେ । ଗୁରୁତର ଆହତ ନାବାଳିକାଙ୍କୁ କଣ୍ଟାମାଳ ଡାକ୍ତରଖାନାରେ ଭର୍ତ୍ତି କରାଯାଇଥିବା ବେଳେ ଘଟଣାସ୍ଥଳରେ କଣ୍ଟାମାଳ ପୁଲିସ ପହଞ୍ଚି ମୃତ ନାବାଳକର ଶବକୁ ଜବତ କରିଛି ।
