ଦେବଗଡ,୧୦/୧୦: ଦେବଗଡ ଆଦର୍ଶ ଥାନା ପୋଲିସ ପକ୍ଷରୁ ୪୯ନମ୍ବର ଜାତୀୟ ରାଜପଥରେ ଯାଉଥିବା ଏକ ବେଆଇନ ଗାଈ ବୋଝେଇ ଟ୍ରକ୍ ଜବତ କରାଯାଇଛି । ଦେବଗଡ ଏସପି ରାଜକିଶୋର ପାଇକରାୟଙ୍କ ନିର୍ଦ୍ଦେଶ ଅନୁଯାୟୀ ଦେବଗଡ ପୋଲିସ ପକ୍ଷରୁ ଏସଆଇ ବୁଦ୍ଧରାୟ ମାଝୀଙ୍କ ନେତୃତ୍ୱରେ ଦେବଗଡ ସହର ବାଇପାସରେ ଗାଡିମଟର ଯାଞ୍ଚ ପ୍ରକ୍ରିୟା ଚାଲିଥିବା ବେଳେ ଗାଈ ବୋଝେଇ ଟ୍ରକ୍ର ଡ୍ରାଇଭର ଗାଡିକୁ ଛାଡି ଚାଲିଯାଇଥିଲା । ପୋଲିସ ସନ୍ଦେହରେ ଟ୍ରକ କୁ ଯାଞ୍ଚ କରିଥିବା ବେଳେ ସେଥିମଧ୍ୟରେ ଗାଈ ଚାଲାଣ ହେଉଥିବା ଦେଖିବାକୁ ପାଇଥିଲେ ।
ଟ୍ରକରେ ମୋଟ ୪୦ ଟି ଗାଈ ଥିବାବେଳେ ସେଥିମଧ୍ୟରୁ ୨୯ଟି ଗାଈକୁ ଜୀବନ୍ତ ଉଦ୍ଧାର କରାଯାଇଥିବା ବେଳେ ୧୧ଟି ଗାଈ ମରିଯାଇଥିବା ଜଣାପଡିଛି । ଦେବଗଡ ପୋଲିସ ଉଦ୍ଧାର କରାଯାଇଥିବା ଗାଈମାନଙ୍କୁ ରେଙ୍ଗାଳବେଡା ଠାରେ ଥିବା ସେବାଧାମରେ ଜିମା ଦେଇଛନ୍ତି । ମୃତ ଗାଈ ଗୁଡିକର ଶବ ବ୍ୟବଛେଦ ପରେ ପୋତିଦିଆଯିବ ବୋଲି ଜଣାପଡିଛି । ଟ୍ରକର ଡ୍ରାଇଭର ଫେରାର ହୋଇଯାଇଥିବା ବେଳେ ପୋଲିସ ପକ୍ଷରୁ ଅଧିକ ଅନୁସନ୍ଧାନ କରାଯାଉଛି ।
