ଘୁ. ଉଦୟଗିରି,୧୧/୬:- ସାରା ରାଜ୍ୟରେ ଥିବା ସମସ୍ତ ସମବାୟ ସମିତି ଗୁଡିକରେ ନିର୍ବାଚନ ନିମନ୍ତେ ଦିନ ଧାର୍ଯ୍ୟ ହେବା ପରେ ନିର୍ବାଚନ ନିମନ୍ତେ ସମସ୍ତ ପ୍ରକ୍ରିୟା କାର୍ଯ୍ୟକାରୀ ହେବାର ଦେଖିବାକୁ ମିଳିଛି । ଘୁ. ଉଦୟଗିରି ଠାରେ ଥିବା ବୃହଦାକାର ବହୁମୂଖୀ ସମବାୟ ସମିତିର ବିଭିନ୍ନ ପଦ ପଦବୀ ଯଥା ସଭାପତି/ଉପସଭାପତି/ ସଦସ୍ୟ, ସଦସ୍ୟା ଆସନ ନିମନ୍ତେ ନିର୍ବାଚନ ଚାଲିଛି । ପ୍ରଥମେ ସଦସ୍ୟ ଆସନ ନିର୍ବାଚନ ହୋଇଥାଏ ଯେଉଁମାନେ ସମବାୟ ସମିତି ସଭାପତି ଙ୍କୁ ନିର୍ବାଚିତ କରିଥାନ୍ତି । ସେହି ପ୍ରକ୍ରିୟାରେ ସ୍ଥାନୀୟ ସମବାୟ ସମିତି ନିମନ୍ତେ ୩୦ ମଇ ନାମାଙ୍କନ ପତ୍ର ଦାଖଲ ନିମନ୍ତେ ଶେଷ ତାରିଖ ଥିଲା କିନ୍ତୁ ୧୮ ଜଣ ସଦସ୍ୟ ବିଭିନ୍ନ ମଣ୍ଡଳୀ ନିମନ୍ତେ ପ୍ରାର୍ଥୀପତ୍ର ଦାଖଲ କରିଥିଲେ । ୦୬ ଜୁନ ପ୍ରାର୍ଥୀପତ୍ର ପ୍ରତ୍ୟାହାର ଶେଷଦିନ ଥିଲା । ୩ ଜଣ ସଦସ୍ୟ ପ୍ରାର୍ଥୀପତ୍ର ପ୍ରତ୍ୟାହାର କରିବା ପରେ ୧୫ ଜଣ ସଦସ୍ୟଙ୍କ ପ୍ରାର୍ଥୀପତ୍ର କାଏମ ରହିଥିଲା ଏବଂ ନିର୍ବାଚନ ଅଧିକାରୀ ବିଭୁଦତ୍ତ ପ୍ରଧାନ ୧୫ ଗୋଟି ସମବାୟ ନିର୍ବାଚନ ମଣ୍ଡଳୀରୁ ୧୫ ଜଣ ସଦସ୍ୟ/ସଦସ୍ୟା ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇଥିବା ଘୋଷଣା କରିଥିଲେ । ସେଥିମଧ୍ୟରୁ ଅନୁସୂଚିତ ଜନଜାତି ପୁରୁଷ ଆସନ ନିମନ୍ତେ ୭ ଟି ନିର୍ବାଚନ ମଣ୍ଡଳୀ, ଅନୁସୂଚିତ ଜନଜାତି ମହିଳା ଆସନ ପାଇଁ ୩ ଟି ନିର୍ବାଚନ ମଣ୍ଡଳୀ, ଅଣ- ସଂରକ୍ଷିତ ଆସନ ପାଇଁ ୫ ଟି ନିର୍ବାଚନ ମଣ୍ଡଳୀ ନିମନ୍ତେ ୧୫ ଜଣ ସଦସ୍ୟ ଓ ସଦସ୍ୟା ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇଛନ୍ତି । ସେମାନେ ହେଲେ ସାହେବ କହଁର ( ଡୁଙ୍ଗି ), ବିବେକାନନ୍ଦ ପ୍ରଧାନ ( ସୁଜେଲି), ଦ୍ୱିଜେନ୍ଦ୍ରନାଥ ପ୍ରଧାନ( ମାଲିକା ପଡ଼ି ), ମୟବନ୍ଧୁ ପ୍ରଧାନ( କୁର୍ମିଙ୍ଗିଆ), ବୀରେନ୍ଦ୍ର ପ୍ରଧାନ ( ବିଲାବାଡା ), ବକ୍ସି ମଲିକ ( ତାରାବାଡ଼ି ),ଜମେଶ ଚନ୍ଦ୍ର ପ୍ରଧାନ ( ବାଡେନାଜୁ ) ,ଶ୍ରୀମତୀ ଲିଲିମା ପ୍ରଧାନ ( ଡମେଙ୍ଗି ), ଯୋଷଦା ପ୍ରଧାନ ( ବାଡେନାଜୁ ) ,ରୁନୁମା ପ୍ରଧାନ ( ବାକିକାମ୍ବା) ,କିଶୋର ଚନ୍ଦ୍ର ପ୍ରଧାନ ( ଘ୍. ଉଦୟଗିରି) ,ସଚିଦାନନ୍ଦ ପ୍ରଧାନ ( ଗୁନ୍ଦାବାଜୁ ),ଦିଲିପ କୁମାର ବଳ ( ଘୁ. ଉଦୟଗିରି), ଯୋଶିତ କୁମାର ପ୍ରଧାନ ( ଜଡାଙ୍ଗବାଲି ) ,ବାକିରାମ ନାୟକ ( କୁର୍ମିଙ୍ଗିଆ ) । ନିର୍ବାଚିତ ସଦସ୍ୟ ମାନଙ୍କ ଦ୍ୱାରା ସଭାପତି ନିର୍ବାଚିତ ହେବାକୁ ଥିବାବେଳେ ସମବାୟ ସମିତି କମିଟି ସଭାପତି ଆସନ ନିମନ୍ତେ ୨୧ ତାରିଖ ନାମାଙ୍କନ ପତ୍ର ଦାଖଲ, ଯାଞ୍ଚ୍, ନିର୍ବାଚନ ସଂକେତ ପ୍ରଦାନ ସହ ପ୍ରତ୍ୟାହାର ଥିବାବେଳେ ୨୨ ତାରିଖ ଚୂଡ଼ାନ୍ତ ପ୍ରାର୍ଥୀଙ୍କ ନାମ ଘୋଷଣା ପରେ ୨୪ ତାରିଖ ଦିନ ସଭାପତି ଆସନ ନିମନ୍ତେ ନିର୍ବାଚନ ହେବା ସହ ଭୋଟ ଗଣତି ଏବଂ ଫଳାଫଳ ଘୋଷଣା କରାଯିବ ବୋଲି ନିର୍ବାଚନ ଅଧିକାରୀଙ୍କ ନିକଟରୁ ସୂଚନା ମିଳିଛି ।
