ହରଭଙ୍ଗା ,୨୨/୭:- ପିଶାଚ ସ୍ୱାମୀର ଟାଙ୍ଗିଆ ଚୋଟରେ ଗଲା ସ୍ତ୍ରୀର ଜୀବନ । ଏମିତି ଏକ ଦୁଃଖଦ ଘଟଣା ଦେଖିବାକୁ ମିଳିଛି ପୁରୁଣାକଟକ ଥାନା ଅଧିନସ୍ଥ ଗଣ୍ଡାପାଜୁ ଗ୍ରାମରେ । ସୂଚନା ମତେ ଆଜି ସକାଳ ୮ ଟା ସମୟରେ ଗଣ୍ଡାପାଜୁ ଗ୍ରାମର କିଶୋରୀ ନାଏକ ଓ ଦୁର୍ଲଭା ନାଏକ ଉଭୟ ସ୍ୱାମୀ ସ୍ତ୍ରୀ ମଧ୍ୟରେ ସାମାନ୍ୟ କଥାକୁ ନେଇ ବଚସା ହୋଇଥିଲା । ଏଥିରେ ଉତକ୍ଷିପ୍ତ ହୋଇ କିଶୋରୀ ନାଏକ ପାଖରେ ଥିବା ଏକ ଟାଙ୍ଗିଆରେ ନିଜ ସ୍ତ୍ରୀ ଦୁର୍ଲଭା ନାଏକଙ୍କ ବେକରେ ଓ ପିଠିପଟେ ଆକ୍ରମଣ କରିଥିଲା । ଫଳରେ ଘଟଣା ସ୍ଥଳରେ ହିଁ ଦୁର୍ଲଭାଙ୍କ ମୃତ୍ୟୁ ଘଟିଥିଲା । ହତ୍ୟା ପରେ ଗାଁ ରେ ଟାଙ୍ଗିଆ ଧରି କିଛି ସମୟ ପାଇଁ ଆତଙ୍କ ଖେଳାଉଥିଲା ହତ୍ୟାକାରୀ । ଗ୍ରାମବାସୀ ପୋଲିସକୁ ଖବର ଦେବା ପରେ ପୋଲିସ ଆସିବା ସୂଚନାପାଇ ଘର ଭିତରେ ଲୁଚିଯାଇଥିଲା । ଘଟଣା ସ୍ଥଳରେ ପୁରୁଣାକଟକ ପୋଲିସ ପହଞ୍ଚି ଟାଙ୍ଗିଆସହ ଅଭିଯୁକ୍ତକୁ ଗିରଫ କରିଥିଲା । ପୋଲିସ ମୃତଶବକୁ ଜବତ କରି ପୋଷ୍ଟମର୍ଟମ ପାଇଁ ବୌଦ୍ଧ ପଠେଇଥିବା ବେଳେ ମୃତକଙ୍କ ବାପା ପୁରୁଣାକଟକ ଥାନାରେ ଏକ ଲିଖିତ ଅଭିଯୋଗ କରିଥିବା ଜଣାପଡ଼ିଛି । ଏ ନେଇ ପୁରୁଣାକଟକ ଥାନାରେ ଅଭିଯୁକ୍ତ କିଶୋରୀ ନାମରେ ୧୧୨/୨୩ ନଂ ରେ ଏକ ମାମଲା ରୁଜୁ ହୋଇଥିବା ଥାନା ଅଧିକାରୀ ଜ୍ୟୋସ୍ନା କାଉଁରୀ ସୂଚନା ଦେଇଛନ୍ତି ।
