ଖୋର୍ଦ୍ଧା,୪/୮ – ଗତ ଜୁଲାଇ ୨୯ ତାରିଖ ବାଘମାରି ବଜାରରେ ବ୍ୟବସାୟୀଙ୍କୁ ଗୁଳିମାଡ଼ ଘଟଣାରେ ୩ ଅଭିଯୁକ୍ତକୁ ପୋଲିସ ଗିରଫ କରି କୋର୍ଟ ଚାଲାଣ କରିଛି । ବାଘମାରି ବଜାରରେ ବ୍ୟବସାୟୀ ମନମୋହନ ସାମନ୍ତରାୟ ଦୋକାନରୁ ୮୦ହଜାର ଟଙ୍କା ନେଇ ଘରକୁ ଫେରିବା ବାଟରେ ତାଙ୍କୁ ଗୁଳିକରି ତାଙ୍କ ନିକଟରୁ ଟଙ୍କା ବ୍ୟାଗ୍ ଛଡାଇ ନେଇଯାଇଥିଲେ । ଗୁଳିମାଡ଼ରେ ତାଙ୍କ ଡାହାଣ ଗୋଡରେ ଗୁରୁତର କ୍ଷତ ହୋଇଥିଲା । ଏହି ଘଟଣାରେ ପୋଲିସ ଏକ ମକଦ୍ଦମା ରୁଜୁ କରି ଘଟଣାର ତଦନ୍ତ ଜାରି ରଖିଥିଲା । ଘଟଣାରେ ୫ଜଣଙ୍କ ସମ୍ପୁକ୍ତି ଥିବା ପୋଲିସ ଜାଣିବାକୁ ପାଇଥିଲା । ସେଥିମଧ୍ୟରୁ ପୋଲିସ୍ ୩ଜଣଙ୍କୁ ଗିରଫ କରିବାରେ ସମର୍ଥ ହୋଇଛି । ଅଭିଯୁକ୍ତମାନେ ହେଲେ କମଳ ମଙ୍ଗରାଜ, ଜୀବନ ସୁନ୍ଦରାୟ, ବରୁଣ ସାମନ୍ତରାୟ । ମୁଖ୍ୟ ଆସାମୀ ଏବେବି ଫେରାର ଅଛି । ଖୁବ୍ଶୀଘ୍ର ସମସ୍ତ ଅଭିଯୁକ୍ତ ମାନଙ୍କୁ ଧରାଯିବା ନେଇ ଏସପି ଗଣମାଧ୍ୟମଙ୍କୁ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ।
