ନୂଆପଡ଼ା,୧୧/୭- ନୂଆପଡ଼ା ଜିଲ୍ଲା ଖଡ଼ିଆଳ ଥାନା ଜୁନପାଣି ନାକାପଡ଼ାରେ ଜଣେ ବୃଦ୍ଧ ଲକ୍ଷ୍ମୀଧର ମାଝୀ (୬୫)କୁ ହତ୍ୟା କରାଯାଇଥିବା ଅଭିଯୋଗ ହୋଇଛି । କିଛି ଦିନ ହେଲା ସେ ଚାଷ ଜମିରେ କୁଡ଼ିଆ କରି ରହୁଥିଲେ । ସୋମବାର ସକାଳେ ଲକ୍ଷ୍ମୀଧରଙ୍କ ବଡ଼ପୁଅ ବିଶେଷ ମାଝୀ ବାପାଙ୍କୁ ଦେଖିବାକୁ ଚାଷ ଜମିକୁ ଯାଇଥିଲେ । ଲକ୍ଷ୍ମୀଧର ରୋଷେଇ କରୁଥିବା ଦେଖି ସେ ଚାଲି ଆସିଥିଲେ । ଜମିରୁ ଆସିବାର କିଛି ଘଣ୍ଟା ପରେ ଲକ୍ଷ୍ମୀଧରଙ୍କୁ ହତ୍ୟା କରାଯାଇଥିବା ନେଇ ପୁଅ ବିଶେଷ ଖବର ପାଇଥିଲେ । ଖବର ପାଇବା ପରେ ସେ ଖଡ଼ିଆଳ ଥାନାରେ ଅଭିଯୋଗ କରିଥିଲେ । ପୁଲିସ୍ ଘଟଣାସ୍ଥଳରେ ପହଞ୍ଚି ଶବ ଜବତ କରିବା ସହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି । ଘଟଣାର ଗୁରୁତ୍ୱକୁ ଦୃଷ୍ଟିରେ ରଖି କୁକୁର ସହ ତଦନ୍ତ କରାଯାଇଥିବା ତଦନ୍ତ ଅଧିକାରୀ ନବଘନ ଗଉଡ଼ ପ୍ରକାଶ କରିଛନ୍ତି ।
