ପୁରୀ,୨୭/୯- ପିପିଲିରେ ପ୍ରଚାର ଶେଷ ଦିନରେ ବିଜେଡି ଜୋରଦାର ପ୍ରଚାର କରିଛି । ବିଜେଡି ପ୍ରାର୍ଥୀ ରୁଦ୍ର ପ୍ରତାପ ମହାରଥୀ ସମଗ୍ର ପିପିଲି ଏନ ଏ ସି ରେ ପ୍ରଚାର କରିଥିବା ବେଳେ ବିଜେଡିର ବରିଷ୍ଠ ନେତାମାନେ ପିପିଲି ଡେଲାଙ୍ଗର ବିଭିନ୍ନ ପଞ୍ଚାୟତରେ ସଭା ସମିତି ଅୟୋଜନ ସମେତ ଡୋର ଟୁ ଡୋର ବୁଲି ପ୍ରଚାର କରିଛନ୍ତି । ରୁଦ୍ରଙ୍କ କହିବା କଥା ତାଙ୍କ ପ୍ରତି ପିପିଲି ବାସୀଙ୍କ ଭଲ ପାଇବା ରହିଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକପ୍ରିୟତା , ସ୍ୱର୍ଗତ ପ୍ରଦୀପ ମହାରଥୀଙ୍କ ପାଇଁ ଲୋକଙ୍କ ଭିତରେ ଥିବା ଭଲ ପାଇବା ହିଁ ତାଙ୍କୁ ବିପୁଳ ଭୋଟରେ ବିଜୟ ଦେବ । ଅନ୍ୟପଟେ ବରିଷ୍ଠ ବିଜେଡି ନେତା ପ୍ରଭାତ ବିଶ୍ୱାଳଙ୍କ କହିବା କଥା ପିପିଲି ନିର୍ବାଚନ ମଣ୍ଡଳୀରେ ଜନମତ ବିଜେଡି ସପକ୍ଷରେ ରହିଛି । ବିଶେଷକରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିଭିନ୍ନ ଜନହିତକାରୀ ଯୋଜନାର ସଫଳ ରୂପାୟନକୁ ନେଇ ଜନସାଧାରଣ ବେଶ ଖୁସି ଅଛନ୍ତି । ପିପିଲି ଉପନିର୍ବାଚନରେ ବିଜେଡି ୩୦ ହଜାରରୁ ଅଧିକ ଭୋଟରେ ଜିତିବ ବୋଲି ବିଜେଡି ନେତା ପ୍ରଭାତ ବିଶ୍ୱାଳ ଦୃଢୋକ୍ତି ପ୍ରକାଶ କରିଛନ୍ତି । ଆଗାମୀ ଅକ୍ଟୋବର ୩ ତାରିଖରେ ଫଳାଫଳରେ ତାହା ସ୍ପଷ୍ଟ ହୋଇଯିବ ବୋଲି ବିଜେଡି ନେତା କହିଛନ୍ତି ।
