ସୁବର୍ଣ୍ଣପୁର : ଗତକାଲି ସନ୍ଧ୍ୟା ସମୟରେ ସୋନପୁର ପୋଲିସ ପେଟ୍ରୋଲିଂ କରୁଥିବା ସମୟରେ ଥାନା ସବ- ଇନ୍ସପେକ୍ଟର ଶମ୍ଭୁଭୂଷଣ ଦେହେରି ଦ୍ରୁତ ଗତିରେ ଯାଉଥିବା ଗୋଟିଏ ଲାଲ ରଙ୍ଗର ହୁଣ୍ଡାଇ ଭରନା କାର୍ ଯାହାର ନମ୍ବର ସି. ଜି. ୦୪ ଡିଡି ୬୬୬୦ କୁ ଅଟକାଇ ଥିବା ବେଳେ ଗାଡ଼ି ଭିତରୁ ୨ ଟି ପିସ୍ତଲ, ଗୁଳି ଓ ମାରଣାସ୍ତ୍ର ସହ ତିନି ଜଣ ଅଭିଯୁକ୍ତ ଅଙ୍କୁର ଦିବାକର, ମୋହିତ ଦିବାକର, ଅଭାଦେସ କୁମାର ଯାଦବ ଯାହାଙ୍କ ଘର ଉତ୍ତର ପ୍ରଦେଶ ବରେଲି ଜିଲ୍ଲାର ବୋଲି ପ୍ରାଥମିକ ତଦନ୍ତରୁ ପୋଲିସ ଜାଣିବାକୁ ପାଇଛି । ପୋଲିସ ତାଙ୍କୁ ଅଟକାଇବାକୁ ପ୍ରୟାସ କରିଥିଲା, ମାତ୍ର ଅଭିଯୁକ୍ତ ମାନେ ଗୁଳି ଭୟ ଦେଖାଇଥିଲେ । ପୋଲିସ ଶେଷରେ ମହାନଦୀ ପୋଲ ପାଖରେ ତାଙ୍କୁ ଅଟକାଇ ଧରିବାରେ ସଫଳ ହୋଇଥିବା ନେଇ ଆରକ୍ଷୀ ଅଧିକ୍ଷକ ଅମରେଶ ପଣ୍ଡା ଆଜି ଗଣମାଧ୍ୟମ ଆଗରେ ପ୍ରକାଶ କରିଛନ୍ତି । ଆଜି ଅଭିଯୁକ୍ତ ମାନଙ୍କୁ କୋର୍ଟ ଚାଲାଣ କରାଯିବା ପରେ ପୁଣି ରିମାଣ୍ଡରେ ଆଣି ଅଧିକ ତଦନ୍ତ ଜାରି ରଖିବେ ବୋଲି ମଧ୍ୟ ସେ ସୂଚନା ଦେଇଛନ୍ତି । ଏହି ସାମ୍ବାଦିକ ସମ୍ମିଳନୀରେ ଏସଡିପିଓ ରାଜକିଶୋର ମିଶ୍ର,ଆଇଆଇସି ପଦ୍ମାସିନୀ ମେହେର ପ୍ରମୁଖ ଉପସ୍ଥିତ ଥିଲେ ।
