ସମ୍ବଲପୁର: ଭିଜିଲାନ୍ସ ଜାଲରେ ମୁଖ୍ୟ ଇଲେକ୍ଟ୍ରିକାଲ ଇନ୍ସପେକ୍ଟର । ସମ୍ବଲପୁର ଜିଲ୍ଲା ମୁଖ୍ୟ ଇଲେକ୍ଟ୍ରିକାଲ ଇନ୍ସପେକ୍ଟର ସୁନିଲ କୁମାର ପଣ୍ଡା ଏବେ ଭିଜିଲାନ୍ସ ହାତରେ ଧରା ପଡିଛନ୍ତି । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ସମ୍ବଲପୁର ସ୍ଥିତ ତାଙ୍କ ବାସଭବନରେ ଭିଜିଲାନ୍ସ ପକ୍ଷରୁ ଚଢ଼ାଉ ହୋଇଛି।
ସମ୍ବଲପୁର ସହରର ଗ୍ରୀନ ପାର୍କ ରେସିଡେନ୍ସି ଠାରେ ଥିବା ସୁନିଲ ପଣ୍ଡାଙ୍କ ୨୦୩ ଓ ୨୦୧ ନମ୍ବର କୋଠାରେ ଭିଜିଲାନ୍ସ ଚଢାଉ ଆରମ୍ଭ କରିଛି । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ସମ୍ବଲପୁର ଭିଜିଲାନ୍ସର ସ୍ବତନ୍ତ୍ର ବିଚାରପତିଙ୍କ ଆଦେଶ ବଳରେ ତାଙ୍କ ବାସଭବନରେ ରେଡ ଚାଲିଛି । ସମ୍ବଲପୁର ଭିଜିଲାନ୍ସ ଡିଭିଜନର ୨ ଜଣ ଡିଏସପି, ୯ ଇନ୍ସପେକ୍ଟର ଓ ୨ ଏସଆଇ ଏହି ରେଡରେ ସାମିଲ ହୋଇଛନ୍ତି ।ଚଢ଼ାଉ ବେଳେ ତାଙ୍କ ବାସଭବନରୁ ଲକ୍ଷାଧିକ ନଗତ ଟଙ୍କା ସହ ବହୁ ଗୁରୁତ୍ବପୂର୍ଣ୍ଣ ଦସ୍ତାବିଜ ମିଳିଥିବା ସୂଚନା ରହିଛି । ତେବେ କେତେ ପରିମାଣର ସେ ସମ୍ପତ୍ତି ଠୁଳ କରିଛନ୍ତି ତାହା ଆକଳନ ପରେ ଜଣାପଡିବ । ଅନ୍ୟପଟେ ଭୁବନେଶ୍ବରର ଖଣ୍ଡଗିରିଠାରେ ମଧ୍ୟ ଭିଜିଲାନ୍ସ ପକ୍ଷରୁ ରେଡ ଚାଲିଥିବା ସୂଚନା ମିଳିଛି।
