ବୌଦ୍ଧ : ବୌଦ୍ଧ ମହାନଦୀ ବ୍ରିଜ ଛକ ନିକଟରୁ ଆଜି ଭୋର ସମୟରେ ଝାଡଖଣ୍ଡ ନମ୍ବର୍ ଥିବା ଗୋଟିଏ ଟ୍ରକରୁ ବିପୁଳ ପରିମାଣର ଗଞ୍ଜେଇ ଜବତ୍ କରାଯାଇଥିବା ଜଣାପଡିଛି । ମିଳିଥିବା ଖବର୍ ଅନୁଯାୟୀ ଆଜି ଭୋର ସମୟରେ ଟ୍ରକ ନମ୍ବର ଜେଏଚ୍ ୧୦ଏଏଲ୍ ୮୨୧୧ରେ ବାହାରକୁ ଗଂଜେଇ ଚାଲାଣ ହେଉଥିବା ସମ୍ପର୍କରେ କେନ୍ଦ୍ରୀୟ ନାରୋକୋଟିକ ଡ୍ରଗ୍ସ ସ୍କ୍ୱାର୍ଡ କୌଣସି ସୂତ୍ରରୁ ଖବର୍ ପାଇ ବୌଦ୍ଧ ମହାନଦୀ ବ୍ରିଜ ଛକ ନିକଟରେ ଛପି ରହିଥିଲେ । ଟ୍ରକ ସହ ଗଂଜେଇ ଜବତ୍ କରି ବୌଦ୍ଧ ଥାନାକୁ ଆଣିଥିଲେ ।
ଓଜନ କରିବା ପରେ ଟ୍ରକରେ ମୋଟ୍ ୬. ୨୩ କ୍ୱିଣ୍ଟାଲ୍ ଗଂଜେଇ ଥିବା ଜଣା ପଡିଥିଲା । ଗଂଜେଇ ଓ ଟ୍ରକକୁ ଜବତ୍ କରାଯାଇଥିବା ବେଳେ ଚାଲାଣରେ ସମ୍ପୃକ୍ତ ୨ ଜଣ ବ୍ୟକ୍ତିଙ୍କୁ ଗିରଫ କରାଯାଇଥିବା ଜଣାପଡିଛି । ଉଭୟ ଅଭିଯୁକ୍ତ ଅନୁଗୁଳ ଜିଲ୍ଲା ହଣ୍ଡପା ଅଂଚଳର ବୋଲି ସୂଚନା ମିଳିଛି । ଗିରଫ ଦୁଇ ଅଭିଯୁକ୍ତ ହେଲେ ଭକ୍ତବନ୍ଧୁ ପ୍ରଧାନ ଓ ସନକ ପ୍ରଧାନ । ଗତ କିଛି ଦିନ ହେଲା ଜିଲ୍ଲାର ବାଉଁଶୁଣୀ ଓ କଣ୍ଟାମାଳ ଥାନା ଅଂଚଳରୁ ଚାଲାଣ ବେଳେ ବହୁ ପରିମାଣର ଗଂଜେଇ ଜବତ୍ ହୋଇଛି ।
