ବାଲିଗୁଡ଼ା ପୋଲିସ୍ କୁ ବଡ଼ ସଫଳତା : ୨୦ ଲକ୍ଷରୁ ଉର୍ଦ୍ଧ୍ବ ଟଙ୍କାର ଗଞ୍ଜେଇ ସହ ଟ୍ରାକ୍ଟର ଜବତ, ଡ୍ରାଇଭର ଗିରଫ

ବାଲିଗୁଡ଼ା: କନ୍ଧମାଳ ଜିଲ୍ଲା ବାଲିଗୁଡ଼ା ପୋଲିସ୍ କୁ ବଡ଼ ସଫଳତା । ବାଲିଗୁଡ଼ା ଥାନା ମହାସିଙ୍ଗି ପଥପ୍ରାନ୍ତ ସେବା କେନ୍ଦ୍ର ନିକଟରେ ଚଢ଼ାଉ କରି ୨୦ଲକ୍ଷରୁ ଉର୍ଦ୍ଧ୍ବ ଟଙ୍କାର ଗଞ୍ଜେଇ ଜବତ କରିଛି ପୋଲିସ୍ । ଘଟଣାରେ ଗଞ୍ଜେଇ ଭର୍ତ୍ତି ଟ୍ରାକ୍ଟରକୁ ଜବତ କରିବାସହ ଡ୍ରାଇଭରକୁ ଗିରଫ କରି କୋର୍ଟ ଚାଲାଣ କରିଛି ପୋଲିସ୍ । ସୂଚନା ପ୍ରକାରେ ବାଲିଗୁଡ଼ା ପୋଲିସ୍ ପକ୍ଷରୁ ଆଇଆଇସି ପ୍ରଶାନ୍ତ କୁମାର ବେହେରା ନିଜ ଟିମ୍ ସହ ରାତ୍ରୀକାଳୀନ ପେଟ୍ରୋଲିଂ ଚାଲୁଥିବା ସମୟରେ ମହାସିଙ୍ଗି ପୁରୁଣା ସାହି ଦେଇ ଗୋଟିଏ ଟ୍ରାକ୍ଟର OD12A 3434 କିଛି ସାମଗ୍ରୀ ଲୋଡ୍ କରି ପଲିଥିନ୍ ଢାଙ୍କି ଯାଉଥାଲା ।

ପୋଲିସ୍ କୁ ଦେଖି ଟ୍ରାକ୍ଟର ଟି କ.ନୂଆଗାଁ ଆଡ଼କୁ ଦୃତ ଗତିରେ ପଳାଇବାକୁ ଚେଷ୍ଟା କରିଥିଲା ଫଳ ଟ୍ରାକ୍ଟର ରେ କିଛି ଚୋରାଚାଲାଣ ହେଉଥିବା ସନ୍ଦେହ କରିଥିଲା ପୋଲିସ୍ । ଟ୍ରାକ୍ଟର କୁ ପିଛା କରିବାପରେ ପଥପ୍ରାନ୍ତ ସେବା କେନ୍ଦ୍ର ନିକଟ ଜଙ୍ଗଲ ରାସ୍ତାରେ ଟ୍ରାକ୍ଟର କୁ ଧରିବାରେ ସକ୍ଷମ ହୋଇଥିଲା ପୋଲିସ୍ । ଟ୍ରାକ୍ଟର ରୂ ୧୫ଟି ଗଞେଇ ବସ୍ତା ଯାହାକି ତିନି କ୍ଵିଣ୍ଟାଲ ୮୩ କେଜି ୫୫୦ଗ୍ରାମ୍(୩୮୩କେଜି ୫୫୦ଗ୍ରାମ୍) ଗଞ୍ଜେଇ ଜବତ କରିବାସହ ଡ୍ରାଇଭରକୁ ଗିରଫ କରିଛି ପୋଲିସ୍ । ଗିରଫ ଡ୍ରାଇଭର ମହାସିଙ୍ଗି ପୁରୁଣା ସାହିର ସଞ୍ଜିବ ଖଟୁଆ ବୋଲି ପୋଲିସ ପକ୍ଷରୁ ସୂଚନା ମିଳିଛି । ଅଞ୍ଚଳରେ ଗଞ୍ଜେଇ ଚୋରାଚାଲାଣ ରୋକିବା ପାଇଁ ପୋଲିସ୍ ପକ୍ଷରୁ ପ୍ରଚେଷ୍ଟା ଜାରିରହିଛି । ଆଗକୁ ମଧ୍ୟ ଏଭଳି ଚଢ଼ାଉ ଯାରିରହିବ ଏବଂ ଚାଲାକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୂଚନା ଦେଇଛନ୍ତି ବାଲିଗୁଡ଼ା ଏସଡିପିଓ ମାନସ ରଞ୍ଜନ ବାରିକ୍ ।