ସମ୍ବଲପୁର, ୨୪/୭- ବର୍ତ୍ତମାନ ସମ୍ବଲପୁରରେ କରୋନା ସଙ୍କଟ ଘନେଇବା ପରିପ୍ରେକ୍ଷୀରେ ଜିଲ୍ଲା ପ୍ରଶାସନକୁ ସାହାଯ୍ୟ କରିବା ପାଇଁ ଆଇଏଏସ ଚଞ୍ଚଳ ରଣାଙ୍କୁ ପଠାଯାଇଛି । ବିଗତ ପ୍ରାୟ ଏକ ସପ୍ତାହ ଭିତରେ ସମ୍ବଲପୁର ଜିଲ୍ଲାରେ କରୋନା ସଂକ୍ରମଣ ବିକଟାଳ ରୂପ ଆଡ଼କୁ ଗତି କରୁଛି । ଆଜିକାର ଘୋଷିତ ୧୩ଟି ପଜିଟିଭ ଚିହ୍ନଟଙ୍କ ମଧ୍ୟରୁ ଅଧିକାଂଶ ସର୍ଭେଲିଏନ୍ସ ଯୋଗୁଁ ଧରାପଡ଼ିଛି, ଅର୍ଥାତ୍ ଆମେ ବର୍ତ୍ତମାନ ସାମାଜିକ ସଂକ୍ରମଣ ସ୍ଥିତିରେ ପହଞ୍ଚି ଯାଇଛୁ । ଏପରି ଅବସ୍ଥାରେ ଜନସାଧାରଣ ଅସହାୟ ହୋଇ ପଡନ୍ତି ଓ ସେମାନଙ୍କ ପାଖରେ ନିଜକୁ ବଞ୍ଚେଇ ରଖିବାପାଇଁ ସାମାଜିକ ଦୂରତା ହିଁ ଏକମାତ୍ର ଉପାୟ । ଏହାସହିତ ପୀଡ଼ିତ ଅଞ୍ଚଳକୁ ସୁରକ୍ଷିତ ରଖିବାପାଇଁ ପ୍ରଶାସନ ପକ୍ଷରୁ ଅପେକ୍ଷିତ ସାହାଯ୍ୟ ହିଁ ସାହାଭରସା । ଏହି ପରିପ୍ରେକ୍ଷୀରେ ଶ୍ରୀ ରଣାଙ୍କ ଏଠାରେ ନିଯୁକ୍ତି ଯଥେଷ୍ଟ ସାହାଯ୍ୟ କରିବ, କାରଣ ଏହି ଜିଲ୍ଲାରେ ସେ ଆଗରୁ କାର୍ଯ୍ୟ କରିଛନ୍ତି । ଏଠାକାର କୁଚିଣ୍ଡା ଉପଖଣ୍ଡରେ ଉପଜିଲ୍ଲାପାଳ ଭାବେ ତାଙ୍କର ଅନୁଭବ ତାଙ୍କ ପାଇଁ ଯଥେଷ୍ଟ ପାଥେୟ ହୋଇପାରିବ ବୋଲି ଆମର ଆଶା ।
