ହାଇଦ୍ରାବାଦ: ମିଳିତ ବିରୋଧୀଙ୍କ ରାଷ୍ଟ୍ରପତି ପ୍ରାର୍ଥୀ ଯଶୋବନ୍ତ ସିହ୍ନାଙ୍କୁ ସମର୍ଥନ ଦେବ ତେଲେଙ୍ଗାନାରେ ଶାସନରେ ଥିବା କେସିଆରଙ୍କ ଦଳ ଟିଆରଏସ । ଦଳର କାର୍ଯ୍ୟକାରୀ ସଭାପତି କେ.ଟି.ଆର ଏନେଇ ସୂଚନା ଦେଇଛନ୍ତି । ଆଜି ସିହ୍ନା ନାମାଙ୍କନ ଦାଖଲ କରିବାକୁ ଥିବାବେଳେ ଦଳ ପକ୍ଷରୁ କେ.ଟି.ଆର ମଧ୍ୟ ଉକ୍ତ କାର୍ଯ୍ୟକ୍ରମରେ ସାମିଲ ରହିବେ ।
ଆଜି ସିହ୍ନା ନାମାଙ୍କନ ଦାଖଲ କରିବାକୁ ଯାଉଥିବାବେଳେ, ଏନସିପି ମୁଖ୍ୟ ଶରଦ ପାୱାର ମଧ୍ୟ ସାମିଲ ହେବା ନେଇ ସୂଚନା ମିଳିଛି । ଏଥିପାଇଁ ଶରଦ ପାୱାର ଦିଲ୍ଲୀ ଗସ୍ତ ମଧ୍ୟ କରିଛନ୍ତି । ଆଜି ନାମାଙ୍କନ ପତ୍ର ଦାଖଲ ପରେ ପରବର୍ତ୍ତୀ ରଣନୀତି ସ୍ଥିର କରିବ ମିଳିତ ମେଣ୍ଟ । ଶାସକ ମେଣ୍ଟର ରାଷ୍ଟ୍ରପତି ପ୍ରାର୍ଥୀ ଦ୍ରୌପଦୀ ମୁର୍ମୁ ମଧ୍ୟ ନାମାଙ୍କନ ଦାଖଲ କରି ସାରିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ବହୁ କେନ୍ଦ୍ରମନ୍ତ୍ରୀ ଓ ଏନଡିଏ ଶାସିତ ରାଜ୍ୟଗୁଡିକର ମୁଖ୍ୟମନ୍ତ୍ରୀମାନେ ମଧ୍ୟ ନାମାଙ୍କନ ଦାଖଲ କାର୍ଯ୍ୟକ୍ରମରେ ସାମିଲ ହୋଇଥିଲେ । ପ୍ରଧାନମନ୍ତ୍ରୀ ନିଜେ ମୁର୍ମୁଙ୍କ ପାଇଁ ପ୍ରସ୍ତାବକ ମଧ୍ୟ ରହିଥିଲେ ।ଶାସକ ଏନଡିଏ ମେଣ୍ଟର ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ କେସିଆରଙ୍କ ଦଳ ଟିଆରଏସ ସମର୍ଥନ ଦେବା ନେଇ ଆଶା କରାଯାଉଥିଲା । ତେଲେଙ୍ଗାନା ମୁଖ୍ୟମନ୍ତ୍ରୀ କେ.ସି.ଆର ନରେନ୍ଦ୍ର ମୋଦି ତଥା ବିଜେପି ବିରୋଧୀ ଆଭିମୁଖ୍ୟ ରଖଥିଲେ ସୁଦ୍ଧା ମୁର୍ମୁ ଜଣେ ଆଦିବାସୀ ନେତ୍ରୀ ହୋଇଥିବା ଯୋଗୁ ଆଦିବାସୀ ବହୁଳ ରାଜ୍ୟ ଭାବେ ତେଲେଙ୍ଗାନା ମଧ୍ୟ ମୁର୍ମୁଙ୍କୁ ସମର୍ଥନ କରିବା ନେଇ ଆଶା କରାଯାଉଥିଲା ।
