ଶିମଲା : ହିମାଚଳ ପ୍ରଦେଶର ଶିମଲାଠାରେ ଏକ ଭୟଙ୍କର କାର ଦୁର୍ଘଟଣା ଘଟିଛି । ଏ ନେଇ ସୋସିଆଲ ମିଡିଆରେ ଏକ ଭିଡିଓ ସାମ୍ନାକୁ ଆସିଛି । ଏକ ମାଙ୍କଡକୁ ବଞ୍ଚାଇବାକୁ ଯାଇ ଏହି ଦୁର୍ଘଟଣା ଘଟିଥିଲା । କାରଟି ଏକ ଉଚ୍ଚ ରାସ୍ତାରୁ ଖସି ପଡି ପାର୍କିଂ ସ୍ଥାନରେ ପଡିଥିଲା । ଏହାପରେ ପାର୍କିଂ ସ୍ଥଳରେ ଥିବା ଦୁଇ ଜଣ ଯାତ୍ରୀ ହଠାତ୍ ଦୌଡି ଆସି ଉପସ୍ଥିତ ବୁଦ୍ଧି ଘଟାଇ କାରରେ ବସିଥିବା ଲୋକଙ୍କୁ ସୁରକ୍ଷିତ ଭାବେ ଉଦ୍ଧାର କରିଥିଲେ । ଏହି ଭିଡିଓ ସିସିଟିଭିରେ କଏଦ ହୋଇଥିଲା, ଯାହା ଏବେ ଭାଇରାଲ ହେବାରେ ଲାଗିଛି । ଭିଡିଓରେ କାରଟି ରାସ୍ତାର ପାର୍ଶ୍ୱରେ ଥିବା ରେଲିଂ ଭାଙ୍ଗି ଶିମଲାର ହୋଟେଲ ହିମଲ୍ୟାଣ୍ଡର ପାର୍କିଂ ସ୍ଥାନକୁ ଖସିପଡିଥିବାର ସ୍ପଷ୍ଟ ଦେଖାଯାଉଛି । କାରରେ ଗୋଟିଏ ପରିବାରର ତିନି ଜଣ ବ୍ୟକ୍ତିଙ୍କ ସହ ୪ ବର୍ଷର ଶିଶୁ ଥିଲେ । ଖୁସିର କଥା, ଏହି ଦୁର୍ଘଟଣାରେ କେହି ଗୁରୁତର ଆହତ ହୋଇନାହାଁନ୍ତି, ସମସ୍ତେ ସାମାନ୍ୟ ଆହତ ହୋଇଥିବା ଜଣାପଡିଛି ।କାରଟି ଦିଲ୍ଲୀରୁ ରାମପୁର ଯାଉଥିଲା ।ଶିମଲାରେ ମାଙ୍କଡମାନେ ରାସ୍ତାରେ ବୁଲିବା ଏବଂ ପର୍ଯ୍ୟଟକଙ୍କଠାରୁ ଖାଦ୍ୟ ସାମଗ୍ରୀ ଛଡ଼ାଇ ନେବା ଏକ ସାଧାରଣ କଥା ।
