ସାନ୍ତାଳୀ ଶାଢୀ ପିନ୍ଧି ରାଷ୍ଟ୍ରପତି ଭାବେ ଶପଥ ନେବେ ଦ୍ରୌପଦୀ ମୁର୍ମୁ ! ଜାଣନ୍ତୁ ଉତ୍ସବରେ ଓଡିଶାରୁ କେଉଁମାନେ ସାମିଲ ହେବେ

ନୂଆଦିଲ୍ଲୀ : ନବ ନିର୍ବାଚିତ ରାଷ୍ଟ୍ରପତି ଦ୍ରୌପଦୀ ମୁର୍ମୁ ସୋମବାର ଦେଶର ସର୍ବୋଚ୍ଚ ସାମ୍ବିଧାନିକ ପଦବୀର ଶପଥ ଗ୍ରହଣ କରିବେ । ଏହି ସମୟରେ ତାଙ୍କୁ ଏକ ପାରମ୍ପାରିକ ସାନ୍ତାଳୀ ଶାଢୀରେ ଦେଖିବାକୁ ମିଳିପାରେ । ପୂର୍ବ ଭାରତର ସାନ୍ତାଳୀ ସମ୍ପ୍ରଦାୟର ମହିଳାମାନେ ପିନ୍ଧିଥିବା ଏକ ସ୍ୱତନ୍ତ୍ର ଶାଢୀ ସହିତ ମୁର୍ମୁଙ୍କ ଭାଉଜ ସୁକ୍ରି ଟୁଡୁ ଦିଲ୍ଲୀ ଆସୁଛନ୍ତି । ସୁକ୍ରି ତାଙ୍କ ସ୍ୱାମୀ ତାରିଣୀସେନ ଟୁଡୁଙ୍କ ସହ ସେଣ୍ଟ୍ରାଲ ହଲରେ ଶପଥ ଗ୍ରହଣ ସମାରୋହରେ ଯୋଗଦେବେ । ଏଥିପାଇଁ ସେ ଶନିବାର ଜାତୀୟ ରାଜଧାନୀ ଅଭିମୁଖେ ଯାତ୍ରା କରିଛନ୍ତି ।
ସୁକ୍ରି ତାଙ୍କ ସ୍ୱାମୀ ଏବଂ ପରିବାର ସହିତ ମୟୂରଭଞ୍ଜ ଜିଲ୍ଲାର ରାୟରଙ୍ଗପୁର ନିକଟ ଉପରବେଡା ଗ୍ରାମରେ ରୁହନ୍ତି । ସେ କହିଛନ୍ତି ଯେ ସେ ମୁର୍ମୁ ପାଇଁ ଏକ ପାରମ୍ପାରିକ ମିଠା ‘ଆରିସା ପିଠା’ ମଧ୍ୟ ନେଇ ଆସିଛି । ସୁକ୍ରି କହିଛନ୍ତି, “ମୁଁ ଦିଦିଙ୍କ ପାଇଁ ଏକ ପାରମ୍ପାରିକ ସାନ୍ତାଳୀ ଶାଢୀ ଆଣିଛି ଏବଂ ଶପଥ ଗ୍ରହଣ ସମାରୋହରେ ସେ ଏହାକୁ ପିନ୍ଧିବେ ବୋଲି ମୁଁ ଆଶା କରୁଛି । ସେ ଏହି ଉତ୍ସବ ପାଇଁ ପ୍ରକୃତରେ କ’ଣ ପିନ୍ଧିବେ ତାହା ମୁଁ ଜାଣି ନାହିଁ । ନୂତନ ରାଷ୍ଟ୍ରପତିଙ୍କ ପୋଷାକ ଉପରେ ରାଷ୍ଟ୍ରପତି ଭବନ ନିଷ୍ପତ୍ତି ନେବ । “
ଏହି ସମୟରେ ମୁର୍ମୁଙ୍କ ଝିଅ ତଥା ବ୍ୟାଙ୍କ ଅଧିକାରୀ ଇତିଶ୍ରୀ ଏବଂ ତାଙ୍କ ସ୍ୱାମୀ ଗଣେଶ ହେମ୍ବ୍ରମ ନୂଆଦିଲ୍ଲୀରେ ପହଞ୍ଚି ନିର୍ବାଚିତ ରାଷ୍ଟ୍ରପତିଙ୍କ ସହ ରହୁଛନ୍ତି । ବିଜେପିର ଜଣେ ବରିଷ୍ଠ ନେତା କହିଛନ୍ତି ଯେ ଶପଥ ଗ୍ରହଣ ସମାରୋହରେ ନିର୍ବାଚିତ ରାଷ୍ଟ୍ରପତିଙ୍କ ପରିବାରର ଚାରିଜଣ ସଦସ୍ୟ – ଭାଇ-ଭାଉଜ, ଝିଅ- ଜ୍ୱାଇଁ ଯୋଗଦେବେ । ସେ କହିଛନ୍ତି ଯେ ଦେଶର ୧୫ ତମ ରାଷ୍ଟ୍ରପତିଙ୍କ ଶପଥ ଗ୍ରହଣ ସମାରୋହରେ ‘ଆଦିବାସୀ’ ସଂସ୍କୃତି ଓ ପରମ୍ପରାର ଝଲକ ଦେଖିବାକୁ ମିଳେ ।
ବିଜୁ ଜନତା ଦଳର ସଭାପତି ତଥା ଓଡିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶନିବାର ଦିନ ଜାତୀୟ ରାଜଧାନୀ ଗସ୍ତରେ ଯାଇଛନ୍ତି । ସେ ମୁର୍ମୁଙ୍କ ଶପଥ ଗ୍ରହଣ ସମାରୋହରେ ମଧ୍ୟ ଯୋଗଦେବେ । ସୂତ୍ରରୁ ପ୍ରକାଶ ଯେ ମୟୂରଭଞ୍ଜ ଜିଲ୍ଲାର ୬ବିଜେପି ବିଧାୟକଙ୍କ ବ୍ୟତୀତ ଇଶ୍ୱରୀୟ ପ୍ରଜାପତି ବ୍ରହ୍ମାକୁମାରୀ ସୁପ୍ରିୟା, ବ୍ରହ୍ମାକୁମାରୀ ବାସନ୍ତୀ ଏବଂ ବ୍ରହ୍ମାକୁମାର ଗୋବିନ୍ଦ ମଧ୍ୟ ନୂଆଦିଲ୍ଲୀରେ ପହଞ୍ଚି ମୁର୍ମୁଙ୍କୁ ଭେଟିଛନ୍ତି ।
କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ, ଧର୍ମେନ୍ଦ୍ର ପ୍ରଧାନ ଏବଂ ବିଶ୍ୱେଶ୍ୱର ଟୁଡୁ, ବିଜେପି ସାଂସଦ ସୁରେଶ ପୂଜାରୀ, ବସନ୍ତ ପଣ୍ଡା, ସଂଗୀତ କୁମାର ସିଂହଦେଓ ଏବଂ ତାଙ୍କ ସ୍ୱାମୀ କେ.ଭି ସିଂହଦେଓ ମୁର୍ମୁଙ୍କୁ ନୂଆଦିଲ୍ଲୀରେ ଭେଟିଥିଲେ । ଶପଥ ଗ୍ରହଣ ସମାରୋହରେ ସେମାନେ ଯୋଗଦେବେ ବୋଲି ଜଣାପଡିଛି ।