ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆସନ୍ତା ବିଦେଶ ଗସ୍ତ କାର୍ଯ୍ୟକ୍ରମ ଅଚାନକ ବାତିଲ କରିଦିଆଯାଇଛି । ସେ ଆସନ୍ତା ଜାନୁଆରୀ ୬ ତାରିଖରେ ସଂଯୁକ୍ତ ଏମିରେଟ୍ସ (ୟୁଏଇ) ଗସ୍ତରେ ଯିବାର ଥିଲା । ଏହାର ନିର୍ଦ୍ଦିଷ୍ଟ କାରଣ ନେଇ ସରକାରୀ ଭାବେ କିଛି କୁହାଯାଇନଥିଲେ ମଧ୍ୟ କରୋନା ତଥା ଓମିକ୍ରନ୍ ସଂକ୍ରମଣ ବୃଦ୍ଧି ପରିପ୍ରେକ୍ଷୀରେ ଏଭଳି ନିଷ୍ପତ୍ତି ନିଆଯାଇଥାଇପାରେ ବୋଲି ଏକସୂତ୍ରରୁ କୁହାଯାଇଛି । ପ୍ରଧାନମନ୍ତ୍ରୀ ତାଙ୍କର ଏହି ଗସ୍ତ କାଳରେ ଏମିରେଟ୍ସର ବରିଷ୍ଠ ନେତା ତଥା ମନ୍ତ୍ରୀମାନଙ୍କୁ ଭେଟିବାର କାର୍ଯ୍ୟକ୍ରମ ରହିଥିଲା । ଏହି ଗସ୍ତ କାଳରେ କେତେକ ଗୁରୁତ୍ୱପୂର୍ଣ୍ଣ ବିଷୟ ଉପରେ ଆଲୋଚନା ସହ ରାଜିନାମା ସ୍ୱାକ୍ଷରିତ ହେବାର ସମ୍ଭାବନା ମଧ୍ୟ ରହିଥିଲା । ବର୍ତ୍ତମାନ ଗସ୍ତ ବାତିଲା ହୋଇଥିବାରୁ ତାହାକୁ ନେଇ ରାଜନୈତିକ ମହଲରେ ଭିନ୍ନ ଚର୍ଚ୍ଚା ଆରମ୍ଭ ହୋଇଛି । ମୋଦିଙ୍କ ଏହି ଗସ୍ତର ନୂଆ ତାରିଖ ଆଗକୁ ଯେକୌଣସି ସମୟରେ ଘୋଷଣା ହୋଇପାରେ ବୋଲି ଏହି ସୂତ୍ରରେ କୁହାଯାଇଛି ।
