ଗୌହାଟୀ: ଦେଶର ସର୍ବପୁରାତନ ରାଜନୀତିକ ଦଳ କଂଗ୍ରେସକୁ ପୁଣିଥରେ ଝଟକା ଲାଗିଛି । ତ୍ରିପୁରା କଂଗ୍ରେସ ମୁଖ୍ୟ ପିଜୁଶ କାନ୍ତି ବିଶ୍ୱାସ ଆଜି ନିଜ ପଦରୁ ଇସ୍ତଫା ଦେଇଛନ୍ତି । ଏଥିସହ ସେ ରାଜନୀତିରୁ ମଧ୍ୟ ଅବସର ଘୋଷଣା କରିଛନ୍ତି । ସେ ଶନିବାର ଦୁଇ ଧାଡିଆ ଟ୍ୱିଟ କରି ଏପରି ସୂଚନା ଦେଇଛନ୍ତି ।
ସେ ଟ୍ୱିଟ କରି ଲେଖିଛନ୍ତି, “ତ୍ରିପୁରା ପିସିସି ସଭାପତି ଭାବେ କାର୍ଯ୍ୟ କରିବା ବେଳେ ମୋତେ ସମର୍ଥନ ଓ ସହଯୋଗ କରିଥିବା ସମସ୍ତଙ୍କୁ କୃତଜ୍ଞତା ଜଣାଉଛି । ସମସ୍ତ କଂଗ୍ରେସ ନେତା ଓ କର୍ମୀଙ୍କୁ ଧନ୍ୟବାଦ । ଆଜି ମୁଁ ସଭାପତି ପଦରୁ ଇସ୍ତଫା ଦେଉଛି ଓ ରାଜନୀତିରୁ ମଧ୍ୟ ଅବସର ଘୋଷଣା କରୁଛି । ମୁଁ ସୋନିଆ ଗାନ୍ଧିଙ୍କୁ ମଧ୍ୟ ଧନ୍ୟବାଦ ଜଣାଉଛି ।”
୨୦୨୩ରେ ତ୍ରିପୁରାରେ ବିଧାନସଭା ନିର୍ବାଚନ ହେବ । ଏଠାରେ ବିଜେପିକୁ କ୍ଷମତାରୁ ହଟାଇ କଂଗ୍ରେସ ସରକାର ଗଠନ କରିବାର ଲକ୍ଷ୍ୟ ରଖିଥିଲା । ଏଥିପାଇଁ ପ୍ରସ୍ତୁତି ମଧ୍ୟ ଆରମ୍ଭ କରିଥିଲା । କିନ୍ତୁ ଖୋଦ କଂଗ୍ରେସର ରାଜ୍ୟ ମୁଖ୍ୟ ଇସ୍ତଫା ଦେବା ଦଳ ପାଇଁ ଶକ୍ତ ଝଟକା ସଦୃଶ ହୋଇଛି ।
ଅନ୍ୟପକ୍ଷରେ ବିଶ୍ୱାସ ହେଉଛନ୍ତି ନିକଟରେ କଂଗ୍ରେସ ଛାଡିଥିବା ସୁସ୍ମିତା ଦେବଙ୍କ ବେଶ ଘନିଷ୍ଠ । ସେ ନିକଟରେ ପଶ୍ଚିମବଙ୍ଗର କ୍ଷମତାସୀନ ଟିଏମସିରେ ମିଶିଛନ୍ତି । ଆଜି ବିଶ୍ୱାସ ରାଜନୀତିରୁ ଅବସର ନେଉଥିବା କହିଛନ୍ତି । ହେଲେ ଗୋଟିଏ ସୂତ୍ରରୁ ଖବର ମିଳିଛି ଯେ ସେ ଖୁବଶୀଘ୍ର ଟିଏମସିରେ ସାମିଲ ହୋଇପାରନ୍ତି । କିନ୍ତୁ ଏ ସମ୍ପର୍କରେ କୌଣସି ବିଧିବଦ୍ଧ ଘୋଷଣା ହୋଇନାହିଁ ।
