ଭୁବନେଶ୍ୱର,୧୩/୪(ସ୍ୱପ୍ର): ଓଡ଼ିଶାର କ୍ରୀଡ଼ାପ୍ରେମୀଙ୍କ ପାଇଁ ଖୁସି ଖବର । ଓଡ଼ିଶାରେ ହେବ ଜୁନିୟର(୧୭ ବର୍ଷରୁ କମ)ମହିଳା ଫୁଟବଲ ବିଶ୍ୱ କପ । ଭୁବନେଶ୍ୱରର କଳିଙ୍ଗ ଷ୍ଟାଡିୟମରେ ଖେଳାଯିବ ଏହି ମର୍ଯ୍ୟାଦାଜନକ ଅନ୍ତର୍ଜାତୀୟ ଇଭେଣ୍ଟ । ଫୁଟବଲର ସର୍ବୋଚ୍ଚ ନିଷ୍ପତ୍ତି ନିର୍ଦ୍ଧାରଣକାରୀ ସଙ୍ଗଠନ ଫିଫା ଏନେଇ ଆଜି ଘୋଷଣା କରିଛି । ଏକ ପ୍ରେସ ବିବୃତିରେ ଫିଫା କହିଛି ଯେ ଗୋଆର ପଣ୍ଡିତ ଜବାହରଲାଲ ନେହେରୁ ଷ୍ଟାଡିୟମ,ଭୁବନେଶ୍ୱରର କାଲିଙ୍ଗ ଷ୍ଟାଡିୟମ ଏବଂ ନାଭି ମୁମ୍ବାଇର ଡିୱାଇ ପାଟିଲ ଷ୍ଟାଡିୟମରେ ଅକ୍ଟୋବର ୧୧ ରୁ ୩୦ ପର୍ଯ୍ୟନ୍ତ ଅଣ୍ଡର-୧୭ ମହିଳା ବିଶ୍ୱକପ ଅନୁଷ୍ଠିତ ହେବ । ଏହି ଟୁର୍ନାମେଣ୍ଟ ପାଇଁ ଡ୍ର’ ଜୁନ ୨୪ରେ ଜୁରିଚରେ ଅନୁଷ୍ଠିତ ହେବ । ଆୟୋଜକ ଭାରତ ବ୍ୟତୀତ ଅନ୍ୟ ୬ଟି ଦେଶ ବ୍ରାଜିଲ, ଚିଲି, ଚୀନ୍ ପିଆର,କଲମ୍ବିଆ,ଜାପାନ ଏବଂ ନ୍ୟୁଜିଲ୍ୟାଣ୍ଡ ଏହି ପ୍ରତିଯୋଗିତାରେ ସାମିଲ ହେବା ନିଶ୍ଚିତ ହୋଇଛି ଏବଂ ୨୪ ଜୁନ୍ରେ ହେବାକୁ ଥିବା ଡ୍ର’ରେ ଏମାନେ ସ୍ଥାନ ପାଇବେ । ଏହି ଟୁର୍ନାମେଣ୍ଟରେ ସମୁଦାୟ ୧୬ଟି ଦଳ ଭାଗନେବେ । ଉଲ୍ଲେଖଯୋଗ୍ୟ ଯେ କରୋନା ମହାମାରୀ କାରଣରୁ ଟୁର୍ଣ୍ଣାମେଣ୍ଟର ୨୦୨୦ ସଂସ୍କରଣ ବାତିଲ ହୋଇଯାଇଥିଲା । ଖେଳାଳି ତଥା ଟୁର୍ଣ୍ଣାମେଣ୍ଟରେ ଅଂଶଗ୍ରହଣ କରୁଥିବା ଅନ୍ୟ ଖେଳାଳିଙ୍କ ସୁରକ୍ଷାକୁ ସୁନିଶ୍ଚିତ କରିବା ପାଇଁ ସବୁ ପ୍ରକାର ବ୍ୟବସ୍ଥା କରାଯିବ । ଆସନ୍ତା ଅକ୍ଟୋବରରେ ଭୁବନେଶ୍ୱରର କଳିଙ୍ଗ ଷ୍ଟାଡିୟମ, ଗୋଆର ପଣ୍ଡିତ ଜବାହରଲାଲ ନେହେରୁ ଷ୍ଟାଡିୟମ ଏବଂ ନାଭି ମୁମ୍ବାଇର ଡିଏ ପାଟିଲ ଷ୍ଟାଡିୟମ ଉଜ୍ଜ୍ୱଳ ଉଦୀୟମାନ ପ୍ରତିଭାଙ୍କୁ ସ୍ୱାଗତ କରିବେ । ମହିଳା ଫୁଟବଲର ଭବିଷ୍ୟତ ତାରକାମାନେ ଏହି ଇଭେଣ୍ଟରୁ ହିଁ ଉଭା ହେବେ । ଫିଫା ମୁଖ୍ୟ ମହିଳା ଫୁଟବଲ ଅଧିକାରୀ ସାରାଇ ବରେମାନ କହିଛନ୍ତି, “ବିଶ୍ୱରେ ଯୋଗ୍ୟତା ଅର୍ଜନ କରିବା ସହିତ ଆମେ ଡ୍ର’ର ତାରିଖ ଘୋଷଣା କରିବା ସହିତ ଫିଫା ଅଣ୍ଡର-୧୭ ମହିଳା ବିଶ୍ୱକପ ୨୦୨୨ ପାଇଁ ତିନୋଟି ହୋଷ୍ଟ ସିଟି ନିଶ୍ଚିତ କରିବା ପାଇଁ ବହୁତ ଉତ୍ସାହିତ । ”
