ସୁବର୍ଣ୍ଣପୁର :ସ୍ଥାନୀୟ ଗାନ୍ଧୀ ପଡିଆଠାରେ ଉଦଘାଟିତ ହୋଇଯାଇଛି ସୋନପୁର ପ୍ରିମିୟର ଲିଗ । ସୋନପୁର ପ୍ରିମିୟର ଲିଗର ପ୍ରଥମ ମ୍ୟାଚରେ ନାଇସେଟ କିଙ୍ଗସ ସମଲେଶ୍ୱରୀ ଟିମ ବିରୁଦ୍ଧରେ ବିଜୟୀ ହୋଇଛି । ପ୍ରଥମେ ବ୍ୟାଟିଂ କରି ଟିମ ସମଲେଶ୍ୱରୀ ନିର୍ଦ୍ଧାରିତ ୨୦ ଓଭରରେ ୭ ଉଇକେଟ ହରାଇ ୧୭୯ରନ ସଂଗ୍ରହ କରିଥିଲେ । ଦଳ ପକ୍ଷରୁ ପ୍ରବୀଣ ଲୁହା ୪୦ ରନ (୩୯ ବଲ ), ସିକନ ସେଠୀ ୩୧ରନ ( ୨୪ ବଲ ) ଓ ସୌରଭ ନାୟକ ଧୂଆଁଧାର ୨୫ ରନ କରିଥିଲେ । ନାଇସେଟ ପକ୍ଷରୁ କେ. ଗୋପାଳକ୍ରିଷ୍ଣା ୨ ଟି ଏବଂ ଲୋକେଶ ସାହୁ, ହରିଶଙ୍କର, ସୁଶାନ୍ତ ବିଶି, ସୁରେଶ ବେହେରା ପ୍ରତ୍ୟେକ ୧ ଟି କରି ଉଇକେଟ ଅକ୍ତିଆର କରିଥିଲେ । ପ୍ରତ୍ୟୁତ୍ତରରେ କେ. ଗୋପାଳକ୍ରୀଷ୍ଣାଙ୍କ ୬୬ ରନ ( ୪୬ବଲ ), ସୁରଜ ମହାପାତ୍ରଙ୍କ ୫୮ ରନ (୩୯ ବଲ ) ଓ ବିଷ୍ଣୁ ନାୟକଙ୍କ ୩୬ ରନ (୨୨ ବଲ ) ସହାୟତାରେ ୧୯.୨ଓଭରରେ ୪ ଉଇକେଟ ବିନିମୟରେ ବିଜୟ ପାଇଁ ଆବଶ୍ୟକ ୧୮୦ ରନ ହାସଲ କରି ବିଜୟୀ ହୋଇଥିଲା । କେ. ଗୋପାଳକ୍ରିଷ୍ଣାଙ୍କୁ “ମ୍ୟାନ ଅଫ ଦି ମ୍ୟାଚ ” ସହ ଶ୍ରେଷ୍ଠ ବ୍ୟାଟର, ଶ୍ରେଷ୍ଠ ବୋଲର ଓ କମାଲ କ୍ୟାଚ ପୁରସ୍କାର ପ୍ରଦାନ କରାଯାଇଥିଲା । ଉଦଘାଟନୀ ସମାରୋହରେ ସୁବର୍ଣ୍ଣପୁର ପୌର ପରିଷଦର ଅଧ୍ୟକ୍ଷା ତାମସୀ ତମସ୍ମିତା ନାଏକ ମୁଖ୍ୟ ଅତିଥି ଭାବରେ ଯୋଗ ଦେଇ ଏହାକୁ ଆନୁଷ୍ଠାନିକ ଭାବରେ ଉଦଘାଟନ କରିଥିଲେ । ସମ୍ମାନୀତ ଅତିଥି ଭାବରେ ପୌର ପରିଷଦର ପୂର୍ବତନ ଅଧ୍ୟକ୍ଷ ପ୍ରକାଶ ଚନ୍ଦ୍ର ସାହୁ ଓ ଲୋକନାଥ ରଥ ଯୋଗ ଦେଇଥିଲେ । ସୁବର୍ଣ୍ଣପୁର ଜିଲ୍ଲା କ୍ରିକେଟ ସଂଘର ସମ୍ପାଦକ ପ୍ରଦୀପ ସେଠୀ ସ୍ୱାଗତ ଭାଷଣ ପ୍ରଦାନ କରିଥିଲେ । ଏସପିଏଲ କମିଟି ଚେୟାରମେନ ବି. ସତ୍ୟନାରାୟଣ ରାଓ ବିବରଣୀ ପ୍ରଦାନ କରିଥିବା ବେଳେ ଜିଲ୍ଲା କ୍ରିକେଟ ସଂଘର ସଭାପତି ରାମଶଙ୍କର ସାହୁ ଧନ୍ୟବାଦ ଅର୍ପଣ କରିଥିଲେ । ମ୍ୟାଚ ପରିଚାଳନା କରଥିଲେ ଶ୍ୟାମସୁନ୍ଦର ପଣ୍ଡା ଓ ଶ୍ରୀମନ୍ତ ନାୟକ । ଅନଲାଇନ ସ୍କୋରିଙ୍ଗ କରିଥିଲେ ଦୀନେଶ ଓ ବିଶ୍ୱନାଥ । ଧାରାବିବରଣୀ ପ୍ରଦାନ କରିଥିଲେ ବି.ଏସ. ରାଓ ଓ ସରୋଜ ନନ୍ଦ ।
