ନୂଆଦିଲ୍ଲୀ : ଅଭିଜ୍ଞ ଉଇକେଟ କିପର ବ୍ୟାଟ୍ସମ୍ୟାନ ଦୀନେଶ କାର୍ତ୍ତିକ ନିକଟରେ ଶେଷ ହୋଇଥିବା ଆଇପିଏଲରେ ଆକର୍ଷଣୀୟ ପ୍ରଦର୍ଶନ କରି ଭାରତୀୟ ଦଳକୁ ପ୍ରତ୍ୟାବର୍ତ୍ତନ କରିଥିଲେ । କିନ୍ତୁ ତାଙ୍କ ପ୍ରତ୍ୟାବର୍ତ୍ତନ ସେତେଟା ପ୍ରଭାବୀ ହୋଇପାରିନାହିଁ । ଗୋଟିଏ ଦୁଇଟି ଇନିଂସକୁ ଛାଡି ଦେଲେ ଅନ୍ୟ ସବୁ ଇନିଂସରେ ପୁରାପୁରି ଭାବରେ ବିଫଳ ହୋଇଛନ୍ତି । ଦଳ ତାଙ୍କୁ ଫିନିସର ଭୂମିକା ଦେଇଥିବା ବେଳେ ସେ ଏହାକୁ ତୁଲାଇ ପାରୁନଥିବା ଦେଖିବାକୁ ମିଳୁଛି । ଫିନିସର ମାନେ ଗୋଟିଏ ଦୁଇଟି ବଲରୁ ବଡ ସଟ୍ ଖେଳିବାକୁ ପଡିଥାଏ କିନ୍ତୁ ଦିନେଶ କାର୍ତ୍ତିକ ତାହା କରିପାରୁନାହାନ୍ତି ।
ଯେତେବେଳେ ସେ ଦଳକୁ ଫେରିଥିଲେ ତାହାକୁ ଐତିହାସିକ ବୋଲି ବିବେଚନା କରାଯାଉଥିଲା । କାରଣ ଏହା ପୂର୍ବରୁ ଖେଳ ଛାଡି କମେଣ୍ଟର ଦୁନିଆରେ ପଦାର୍ପଣ କରିସାରିଥିଲେ । ତେଣୁ ସେ ଆଉ ଅନ୍ତର୍ଜାତୀୟ କ୍ରିକେଟ ଫେରିବା ତାଙ୍କ ପକ୍ଷେ ସହଜ ନଥିଲା । କିନ୍ତୁ ସେ ତାହା କରିପାରିଥିଲେ ।
ଦୀନେଶ କାର୍ତ୍ତିକ ପ୍ରାୟ ଅଢେଇ ବର୍ଷ ପରେ ଅନ୍ତର୍ଜାତୀୟ କ୍ରିକେଟକୁ ଫେରିଥିଲେ ଏବଂ ଫେରିବା ଦିନଠାରୁ ୯ ଟି ଇନିଂସ ଖେଳିଛନ୍ତି, ସେଥିମଧ୍ୟରୁ ସେ କେବଳ ଦୁଇଟି ଇନିଂସରେ ପ୍ରଭାବଶାଳୀ ପ୍ରମାଣିତ ହୋଇଛନ୍ତି । ଏହା ଦର୍ଶାଏ ଯେ ତାଙ୍କର ପ୍ରତ୍ୟାବର୍ତ୍ତନ ଦୁର୍ବଳ ଦେଖାଯାଉଛି । ଦୀନେଶ କାର୍ତ୍ତିକ ପ୍ରଥମ ବଲରୁ ମାରିବା ଆରମ୍ଭ କରିବେ ବୋଲି ଆଶା କରାଯାଏ, କିନ୍ତୁ ସେ ୪ କିମ୍ବା ୬ ଟି ବଲ ଖେଳିବା ପରେ ଏହା କରନ୍ତି ଏବଂ ସେ ଶୀଘ୍ର ଆଉଟ୍ ମଧ୍ୟ ହୋଇଯାଉଛନ୍ତି ।
ଅନ୍ତର୍ଜାତୀୟ କ୍ରିକେଟ୍ ରେ ପ୍ରତ୍ୟାବର୍ତ୍ତନ କରିବା ପରେ ଯଦି ଆମେ ତାଙ୍କ ସ୍କୋରକୁ ଦେଖିବା, ତେବେ ସେ ୨ଟି ଇନିଂସରେ ଆଉଟ୍ ହୋଇନଥିଲେ । ପ୍ରଥମ ଇନିଂସରେ ୨୧ ବଲରେ ୩୦ ରନ କରିଥିବା ବେଳେ ଦ୍ୱିତୀୟ ମ୍ୟାଚରେ ୮ ଟି ବଲରେ ୬ ରନ୍, ୨୭ ବଲରେ ୫୫ ରନ୍, ୫ ଟି ବଲରେ ୫ ରନ୍, ଗୋଲଡେନ୍ ଡକ୍, ୭ ବଲରେ ୧୧ ରନ୍, ୧୭ ବଲରେ ୧୨ ରନ୍ ଏବଂ ୭ ବଲରେ ୬ ରନ୍ କରିଛନ୍ତି । ଏଥିମଧ୍ୟରୁ ୩୦ ରନ୍ ଏବଂ ୫୫ ରନ୍ ଭଲ ବୋଲି ଧରାଯିବ, କାରଣ ଅଧିକାଂଶ ଇନିଂସରେ ସେ ମ୍ୟାଚ୍ ଶେଷ କରିବା ପୂର୍ବରୁ ଆଉଟ୍ ହୋଇଥିଲେ ।
ପ୍ରତ୍ୟାବର୍ତ୍ତନ ପରଠାରୁ ସେ ଟି-୨୦ ଆନ୍ତର୍ଜାତୀୟ କ୍ରିକେଟ୍ ରେ ହାରାହାରି ୨୧ ଏବଂ ଷ୍ଟ୍ରାଇକ୍ରେଟ୍ ୧୩୪ କରିଛନ୍ତି, ଯାହା ୬ ନମ୍ବର ବ୍ୟାଟ୍ସମ୍ୟାନ୍ଙ୍କ ପାଇଁ କୌଣସି ଗୁଣରେ ଭଲ ନୁହେଁ । ଏଭଳି ପରିସ୍ଥିତିରେ ୱେଷ୍ଟଇଣ୍ଡିଜ୍ ବିପକ୍ଷ ପାଞ୍ଚ ମ୍ୟାଚ୍ ବିଶିଷ୍ଟ ଟି -୨୦ ସିରିଜ୍ ତାଙ୍କ କ୍ୟାରିୟର ସ୍ଥିର କରିବ । ଯଦି ସେ ସେହି ସିରିଜରେ ବିଫଳ ହୁଅନ୍ତି ତେବେ ସେ ନିଶ୍ଚିତ ଭାବରେ ଏସିଆ କପ୍ ୨୦୨୨ ଏବଂ ଟି -୨୦ ବିଶ୍ୱକପ ୨୦୨୨ ଦଳରୁ ବାଦ ପଡିପାରନ୍ତି ।
