ମୋହଲି : ମୋହଲିର ଆଇଏସ୍ ବିନ୍ଦ୍ରା ଷ୍ଟାଡିୟମରେ ଶ୍ରୀଲଙ୍କା ବିପକ୍ଷ ପ୍ରଥମ ଟେଷ୍ଟର ତୃତୀୟ ଦିନରେ ଭାରତୀୟ ତାରକା ଅଫ୍ ସ୍ପିନର ରବିଚନ୍ଦ୍ରନ୍ ଅଶ୍ୱିନ୍ କପିଲ ଦେବଙ୍କ ରେକର୍ଡ ଭାଙ୍ଗିଛନ୍ତି । ଟେଷ୍ଟ କ୍ରିକେଟରେ ଅଶ୍ୱିନ ବର୍ତ୍ତମାନ ଭାରତ ପାଇଁ ଦ୍ୱିତୀୟ ସର୍ବାଧିକ ୱିକେଟ୍ ହାସଲକାରୀ ବୋଲର ହେବାର ସୌଭାଗ୍ୟ ଅର୍ଜନ କରିଛନ୍ତି । କପିଲ ଦେବଙ୍କ ରେକର୍ଡ ଭାଙ୍ଗି ସେ ଏହି କୀର୍ତ୍ତିମାନ ହାସଲ କରିଛନ୍ତି । ଚାରିଥ ଆସାଲଙ୍କାଙ୍କୁ ଆଉଟ କରିବା ପରେ ଅଶ୍ୱିନ୍ ଏହି ସଫଳତା ହାସଲ କରିଥିଲେ । ଅଶ୍ୱିନ ବର୍ତ୍ତମାନ ଟେଷ୍ଟରେ ୪୩୫ ୱିକେଟ୍ ନେଇଛନ୍ତି । ସେହିପରି ବିଶ୍ୱର ସର୍ବାଧିକ ୱିକେଟ ହାସଲକାରୀ ବୋଲର ହିସାବରେ ସେ ନବମ ସ୍ଥାନରେ ପହଞ୍ଚିଛନ୍ତି । ଏହି ମାମଲାରେ ମଧ୍ୟ ସେ କପିଲ ଦେବଙ୍କୁ ପଛରେ ପକାଇଛନ୍ତି । କପଲ ଦେବଙ୍କ ନାମରେ ୪୩୪ ୱିକେଟ ରହିଛି ।
