ନୂଆଦିଲ୍ଲୀ : ଟିମ୍ ଇଣ୍ଡିଆର ଦ୍ରୁତ ବୋଲର ଦୀପକ ଚହର ଏବଂ ତାଙ୍କ ପ୍ରେମିକା ଜୟା ଭରଦ୍ୱାଜ ଆଜି ବିବାହ ବନ୍ଧନରେ ବାନ୍ଧି ହେବେ । ଦୀପକ ନିଜ ଘର ଆଗ୍ରାରେ ବିବାହ କରୁଛନ୍ତି । ତାଙ୍କ ବିବାହରେ ଯୋଗଦେବା ପାଇଁ ଏମଏସ ଧୋନି ମଧ୍ୟ ପହଞ୍ଚିବେ ବୋଲି କୁହାଯାଉଛି । ଦୀପକ-ଜୟାଙ୍କ ସଂଗୀତ ଏବଂ ମେହେନ୍ଦି ସମାରୋହର ଚିତ୍ର ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଦୀପକ ଚହର ଆଇପିଏଲ ୨୦୨୨ ର ମେଗା ନିଲାମରେ ନିଜର ମୂଳ ମୂଲ୍ୟ ୨ କୋଟିରେ ସାମିଲ ହୋଇଥିଲେ ଏବଂ ଚେନ୍ନାଇ ସୁପର କିଙ୍ଗ୍ସ ଦ୍ୱାରା ୧୪ କୋଟି ଟଙ୍କାରେ କିଣାଯାଇଥିଲେ, ଯଦିଓ ଆଘାତ ହେତୁ ଦୀପକ ଆଇପିଏଲ ୨୦୨୨ ର ଅଂଶ ହୋଇପାରିନଥିଲେ ।
ମିଡିଆ ରିପୋର୍ଟ ଅନୁଯାୟୀ ମଙ୍ଗଳବାର ସନ୍ଧ୍ୟାରେ ଏକ ସଂଗୀତ ସମାରୋହ ଅନୁଷ୍ଠିତ ହୋଇଥିଲା, ଯାହାର କିଛି ଚିତ୍ର ସୋସିଆଲ ମିଡିଆରେ ସେୟାର କରାଯାଇଛି । ଦୀପକ ଚହରଙ୍କ ସମ୍ପର୍କୀୟ ଭାଇ ରାହୁଲ ଚହର ଇନଷ୍ଟାଗ୍ରାମରେ ଭାଇ ଓ ଭାଉଜଙ୍କ ଫଟୋ ସେୟାର କରିଛନ୍ତି ।
ଗଣମାଧ୍ୟମ ରିପୋର୍ଟ ଅନୁଯାୟୀ, ଦୀପକ ଚହରଙ୍କ ବିବାହ ପାଇଁ ଆଗ୍ରାସ୍ଥିତ ଜୟପି ହୋଟେଲ ବୁକ୍ କରାଯାଇଛି । ଦିଲ୍ଲୀର ଆଇଟିସି ମୌର୍ଯ୍ୟ ହୋଟେଲର କମଲ ମହଲରେ ଉଭୟଙ୍କ ରିସିପସନ ଅନୁଷ୍ଠିତ ହେବ । ଦିଲ୍ଲୀ ମଧ୍ୟ ଜୟାଙ୍କ ହୋମ୍ ଟାଉନ୍ । ଦୀପକ ଚହରଙ୍କ ବିବାହରେ ଅନେକ କ୍ରିକେଟର ଯୋଗ ଦେବାର କାର୍ଯ୍ୟକ୍ରମ ରହିଛି । ଅତିଥି ତାଲିକାରେ ବିରାଟ କୋହଲିଙ୍କ ନାମ ମଧ୍ୟ ଅନ୍ତର୍ଭୁକ୍ତ ହୋଇଛି ।
