ନୂଆଦିଲ୍ଲୀ : ଭାରତୀୟ ଦଳ ଆଇପିଏଲ ୨୦୨୨ ପରେ ଜୁନ୍ ଦ୍ୱିତୀୟ ସପ୍ତାହରୁ ଦକ୍ଷିଣ ଆଫ୍ରିକା ବିପକ୍ଷରେ ୫ ମ୍ୟାଚ୍ ବିଶିଷ୍ଟ ଟି -୨୦ ଅନ୍ତର୍ଜାତୀୟ ସିରିଜ୍ ଖେଳିବ । ଏହା ପରେ ଦଳକୁ ଆୟର୍ଲାଣ୍ଡ ଏବଂ ଇଂଲଣ୍ଡ ଗସ୍ତରେ ଯିବ । ଏପରି ପରିସ୍ଥିତିରେ କାର୍ଯ୍ୟଭାରକୁ ଧ୍ୟାନରେ ରଖି ଭାରତୀୟ ଦଳର ପ୍ରମୁଖ ଖେଳାଳିଙ୍କୁ ବିଶ୍ରାମ ଦିଆଯିବ । କେତେକ ଖେଳାଳିଙ୍କୁ କିଛି ମ୍ୟାଚ୍ ଖେଳିବାକୁ ପଡିପାରେ, କାରଣ କିଛି ଖେଳାଳିଙ୍କ ଫର୍ମ ମଧ୍ୟ ଚିନ୍ତାର ବିଷୟ ପାଲଟିଛି ।
ପିଟିଆଇର ରିପୋର୍ଟ ଅନୁଯାୟୀ, ଅଧିନାୟକ ରୋହିତ ଶର୍ମା, ବରିଷ୍ଠ ବ୍ୟାଟ୍ସମ୍ୟାନ୍ ବିରାଟ କୋହଲି, କେ.ଏଲ୍ ରାହୁଲ, ୱିକେଟ୍ କିପର ଋଷଭ ପନ୍ତ, ଦ୍ରୁତ ବୋଲର ଜସପ୍ରୀତ ବୁମ୍ରା, ମହମ୍ମଦ ଶାମି, ସ୍ପିନର ରବିନ୍ଦ୍ର ଜାଡେଜାଙ୍କ ସମେତ ସମସ୍ତ ପ୍ରମୁଖ ଖେଳାଳିଙ୍କୁ ବ୍ରିଟେନକୁ ଯିବା ପୂର୍ବରୁ ପର୍ଯ୍ୟାପ୍ତ ବିଶ୍ରାମ ଦିଆଯିବ । ତଥାପି, କିଛି ଖେଳାଳିଙ୍କୁ କିଛି ମ୍ୟାଚ୍ ଖେଳିବାକୁ ପଡିପାରେ ।
ବିସିସିଆଇର ଜଣେ ଅଧିକାରୀ କହିଛନ୍ତି, “ଜୁନ୍ ୯ ରୁ ୧୯ ପର୍ଯ୍ୟନ୍ତ ୫ଟି ସହରରେ ୫ ଟି -୨୦ ଅନ୍ତର୍ଜାତୀୟ ଖେଳାଯିବାକୁ ସ୍ଥିର ହୋଇଛି । କେତେକ ଖେଳାଳି କିଛି ମ୍ୟାଚ ଖେଳି ଅନ୍ୟ ମ୍ୟାଚ ଗୁଡିକରୁ ବିଶ୍ରାମ ନେଇପାରନ୍ତି । ସେହିପରି କେତେକଙ୍କୁ ସମ୍ପୂର୍ଣ୍ଣ ବିଶ୍ରାମ ଦିଆଯାଇପାରେ ଏବଂ କେତେକଙ୍କୁ କିଛି ମ୍ୟାଚ୍ ଖେଳିବାକୁ ପଡ଼ିବ । କିନ୍ତୁ ମୁଖ୍ୟ ପ୍ରଶିକ୍ଷକ (ରାହୁଲ ଦ୍ରାବିଡ) ଙ୍କ ସହ କଥା ହେବା ପରେ ଚୟନକର୍ତ୍ତାମାନେ ବିରତିର ସମୟ ସ୍ଥିର କରିବେ ବୋଲି ସେ କହିଛନ୍ତି ।
କ୍ରିକେଟ ପଡିଆକୁ ଫେରିଥିବା ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କୁ ଦଳରେ ସ୍ଥାନ ମିଳିବ କି ନାହିଁ ତାହା ମଧ୍ୟ ଏକ ଖବର ହେବ । ଆଇପିଏଲ ଜରିଆରେ ପଡିଆକୁ ଫେରିଥିବା ହାର୍ଦ୍ଦିକଙ୍କୁ ଦକ୍ଷିଣ ଆଫ୍ରିକା ସିରିଜ୍ ପାଇଁ ଚୟନ କରାଯିବ ନା ଆୟର୍ଲାଣ୍ଡର ଟି-୨୦ ସିରିଜରେ ସାମିଲ କରାଯିବ ତାହା ଦେଖିବାକୁ ବାକି ରହିଲା । ହାର୍ଦ୍ଦିିକ ପାଣ୍ଡ୍ୟା ଟି -୨୦ ବିଶ୍ୱକପ ୨୦୨୧ ପରଠାରୁ ଟିମ୍ ଇଣ୍ଡିଆରୁ ବାହାରେ ଅଛନ୍ତି ଏବଂ ଆଇପିଏଲ୍ ୨୦୨୨ ସହିତ ପ୍ରତ୍ୟାବର୍ତ୍ତନ କରିଛନ୍ତି । ସେ ମଧ୍ୟ ଗୁଜରାଟ ଟାଇଟାନ୍ସର ଅଧିନାୟକ ଏବଂ ଦଳ ଭଲ ପ୍ରଦର୍ଶନ କରୁଛି ।
