ଚଣ୍ଡିଗଡ : ଭାରତର ପୂର୍ବତନ ଅଧିନାୟକ ବିରାଟ କୋହଲି ତାଙ୍କର ୧୦୦ ତମ ଟେଷ୍ଟ ମ୍ୟାଚ୍ ଖେଳୁଛନ୍ତି । ଭାରତ ଏବଂ ଶ୍ରୀଲଙ୍କା ମଧ୍ୟରେ ଚାଲିଥିବା ଦୁଇ ମ୍ୟାଚ୍ ବିଶିଷ୍ଟ ସିରିଜର ପ୍ରଥମ ଟେଷ୍ଟ ମ୍ୟାଚ୍ ଆଜିଠାରୁ ମୋହାଲିର ପିସିଏସ ଆଇଏସ ବିନ୍ଦ୍ରା ଷ୍ଟାଡିୟମରେ ଖେଳାଯାଉଛି, ଯାହାକି ବିରାଟଙ୍କ ୧୦୦ ତମ ଟେଷ୍ଟ ମ୍ୟାଚ୍ । ଏହି ମ୍ୟାଚ୍ ପୂର୍ବରୁ ଟିମ୍ ଇଣ୍ଡିଆର ମୁଖ୍ୟ ପ୍ରଶିକ୍ଷକ ରାହୁଲ ଦ୍ରାବିଡ ପଡ଼ିଆରେ ବିରାଟଙ୍କୁ ଏକ ବିଶେଷ ଉପହାର ଦେଇଥିଲେ । ଏହି ସମୟରେ ତାଙ୍କ ପତ୍ନୀ ତଥା ବଲିଉଡ ଅଭିନେତ୍ରୀ ଅନୁଷ୍କା ଶର୍ମା ବିରାଟଙ୍କ ସହ ପଡ଼ିଆରେ ଉପସ୍ଥିତ ଥିଲେ । ଏବ ଅବସରରେ କୋଚ ଦ୍ରାବିଡ ବିରାଟଙ୍କୁ ଏକ ଟୋପି ପ୍ରଦାନ କରିଥିଲେ । ଏହାପରେ ପତ୍ନୀ ଅନୁଷ୍କାଙ୍କୁ ବିରାଟ ଆଲିଙ୍ଗନ କରିଥିଲେ । ଯାହାର ଫଟୋ ଏବେ ଖୁବ ଭାଇରାଲ ହେବାରେ ଲାଗିଛି ।
୧୦୦ତମ ଟେଷ୍ଟର ଗୋଟିଏ ଦିନ ପୂର୍ବରୁ କ୍ରିକେଟ୍ ବୋର୍ଡ ଅଫ୍ ଇଣ୍ଡିଆ (ବିସିସିଆଇ) ସେୟାର କରିଥିବା ବିରାଟଙ୍କ ଏକ ସାକ୍ଷାତକାରରେ ସେ କହିଥିଲେ ଯେ ଅନୁଷ୍କା ତାଙ୍କ କ୍ୟାରିୟରରେ ବହୁତ ଅବଦାନ ରଖିଛନ୍ତି ।
ବିରାଟ ଏବଂ ଅନୁଷ୍କାଙ୍କ ଫଟୋ ସୋସିଆଲ ମିଡିଆରେ ବହୁତ ସେୟାର କରାଯାଉଛି । ଏହି ସମୟରେ ଅନୁଷ୍କା ଧଳା ଟପ୍ ଏବଂ ବେଜି ରଙ୍ଗର ଟ୍ରାଉଜରରେ ଦେଖାଦେଇଥିଲେ । ବିରାଟ ଏବଂ ଅନୁଷ୍କା ଡିସେମ୍ବର ୨୦୧୭ ରେ ବିବାହ କରିଥିଲେ । ପ୍ରଶଂସକମାନେ ଆଶା କରିଛନ୍ତି ଯେ ବିରାଟ ଏହି ସ୍ୱତନ୍ତ୍ର ଟେଷ୍ଟ ମ୍ୟାଚରେ ୭୧ ତମ ଅନ୍ତର୍ଜାତୀୟ ଶତକ ହାସଲ କରିବେ । ଦୁଇ ବର୍ଷରୁ ଅଧିକ ସମୟ ଧରି ବିରାଟ କୌଣସି ଆନ୍ତର୍ଜାତୀୟ ଶତକ ଅର୍ଜନ କରିନାହାଁନ୍ତି ।
