ପୁରୀ :

ବ୍ରହ୍ମଗିରିର ପୂର୍ବତନ ବିଧାୟକ ତଥା ରାଜ୍ୟ ଯୋଜନା ବୋର୍ଡ ଉପାଧ୍ୟକ୍ଷ ସଞ୍ଜୟ ଦାସବର୍ମାଙ୍କ ପ୍ରାଇଭେଟ୍‌ ପିଏସ୍‌ଓ ନିଖୋଜ ଥିବା ବେଳେ ଆଜି ସକାଳୁ ପୁରୀ ସଦର ଥାନା ଗଡ଼ମୃଗସିରା ବ୍ରିଜ ନିକଟ ନୂଆନଇ ପଠାରୁ ପିଏସ୍‌ଓଙ୍କ ମୃତଦେହ ଉଦ୍ଧାର ହୋଇଛି । ଏ ନେଇ ପୁରୀ ସଦରଥାନା ପୋଲିସର ଏକ ମାମଲା ରୁଜୁ ତଦନ୍ତ ଆରମ୍ଭ କରିଛି । ତେବେ ନିଖୋଜ ଯୁବକଙ୍କ ମୃତ୍ୟୁ କିଭଳି ହେଲା ତାହା ତଦନ୍ତ ପରେ ଜଣାପଡିବ ବୋଲି ସଦର ଥାନା ପୋଲିସ କହିଛି । ମୃତକ ଯୁବକ ହେଉଛନ୍ତି ହେଉଛନ୍ତି ବ୍ରହ୍ମଗିରି ବ୍ଲକ୍‌ ଅନ୍ତର୍ଗତ ସାନବନ୍ଧକେରା ଗ୍ରାମର ୨୨ ବର୍ଷୀୟ ଚିତ୍ତରଞ୍ଜନ ପଲେଇ ।

ପୋଲିସ କହିବା ଅନୁଯାୟୀ ନିଖୋଜ ଚିତ୍ତରଞ୍ଜନ ଗତକାଲି ତାଙ୍କର କିଛି ବନ୍ଧୁଙ୍କ ସହ ଭୋଜି କରିବାକୁ ଯାଇ ଆଉ ଘରକୁ ଫେରିନଥିବା ପରିବାର ଲୋକେ ଅଭିଯୋଗ କରିଛନ୍ତି । ତେବେ ସଦର ଗଡମୃଗସିରା ବ୍ରିଜ୍‌ ନିକଟରେ ରକ୍ତଛିଟା ପଡିଥିବା ବେଳେ ଜୋତା,ମୋବାଇଲ ଇତ୍ୟାଦି ପୋଲିସ ଜବତ କରିଛି । ତେଣୁ ଏସବୁ ଘଟଣାକୁ ଦେଖିଲେ ଚିତ୍ତରଞ୍ଜନକୁ ହତ୍ୟା କରାଯାଇଥିବା କିମ୍ବା ତାଙ୍କୁ ପାଣିରେ ବୁଡାଇ ଦିଆଯାଇଥିବା ପୋଲିସ ସନ୍ଦେହ କରୁଛି । ପିଏସ୍‌ଓଙ୍କ ମୃତଦେହ ଉଦ୍ଧାର ପରେ ସଦରଥାନା ପୋଲିସ ତଦନ୍ତ ଜାରି ରଖିଥିବା ବେଳେ ସାଇଣ୍ଟିଫିକ୍‌ ଦଳ ଘଟଣାସ୍ଥଳକୁ ଯାଇ ଅନୁସନ୍ଧାନ କରିବ ବୋଲି ପୋଲିସ ସୂଚନା ଦେଇଛି ।