ପୁରୀ : ପୁରୀ ପୋଲିସକୁ ବଡ ସଫଳତା । ୩ ବନ୍ଧୁକ ସହ ୪ ମୋବାଇଲ ଓ ଛୁରୀ ଜବତ ହୋଇଛି । ସ୍ପେଶାଲ ସ୍କ୍ୱାର୍ଡ ଓ ତାଳବଣିଆ ଥାନା ପୋଲିସକୁ ମିଳିଛି ଏହି ସଫଳତା । ଏହି ଘଟଣାର ୫ ଦୁର୍ଦ୍ଦାନ୍ତ ଅପରାଧୀଙ୍କୁ ଗିରଫ କରାଯାଇଛି । ଅପରାଧୀଙ୍କ ବିରୁଦ୍ଧରେ ଜାରି ରହିବ ଅପରେସନ । ଏ ନେଇ ଏସପି କେ.ବିଶାଲ ସିଂହଙ୍କ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ଭେଟେରାନ ଅପରାଧୀ ମନୁଆ ମହାନ୍ତି ସମେତ ତାର ୪ ସହଯୋଗୀ ଗିରଫ ହୋଇଛନ୍ତି । ଗିରଫ ଅଭିଯୁକ୍ତ ହେଉଛନ୍ତି ଜଗତସିଂହପୁରର ସୌମ୍ୟରଞ୍ଜନ ବିଶ୍ୱାଳ, ରଘୁପତି ନଗରର ମିଳନ ମିଶ୍ର, ସୁଆର ସାହିର ଦୀପକ ସୁଆର ଓ ମାର୍କଣ୍ଡେଶ୍ୱର ସାହିର ନିଲୁ ବାରିକ । ଏମାନେ ହୁଳୁହୁଳିଆ ପୋଲ ନିକଟ ଏକ ପରିତ୍ୟକ୍ତ ଘରେ ଆଶ୍ରୟ ନେଇଥିବାବେଳେ ସ୍ପେଶାଲ ସ୍କ୍ୱାର୍ଡ ଓ ତାଳବଣିଆ ଥାନା ପୋଲିସ ସେମାନଙ୍କୁ ଗିରଫ କରିଥିଲା । ସିଆରପିସିର ୧୧୦ ମାମଲାରେ ବୁକ୍ କରାଯାଇଛି । ତା ନାଁରେ ୧୮ ମାମଲା ରହିଛି । ସେମାନଙ୍କ ଠାରୁ ୩ ସେମି ଅଟୋମେଟିକ ପିସ୍ତଲ ୧୦ ଜୀବନ୍ତ ଗୁଳି ଜବତ ହୋଇଛି । ଗତ ୨୯ ଦିନ ଧରି ଗୁଇନ୍ଦା ବିଭାଗ ତାର ଗତି ବିଧି ଉପରେ ନଜର ରଖିଥିଲେ । ମନୁଆ ତାର ଲୋକେସନ୍ ବଦଳାଇଥିଲା ବୋଲି ଏସପି ସମ୍ମିଳନୀରେ ସୂଚନା ଦେଇଥିଲେ । ଅତିରିକ୍ତ ଏସପି ମିହିର ପଣ୍ଡା, ବି କେ ହରିପ୍ରସାଦ, ତାଲବାଣିଆ ଥାନାଧିକାରୀ ସୁଜାତା ବେହେରା ପ୍ରମୁଖ ଉପସ୍ଥିତ ଥିଲେ ।
