ପୁରୀ : ପୁରୀ ଏସ୍ଟିଏଫ୍ ପକ୍ଷରୁ ଚଢ଼ାଉ କରାଯାଇ ୧୪ ଲକ୍ଷ ଟଙ୍କାର ବ୍ରାଉନ ସୁଗାର ଜବତ କରାଯାଇଛି । ଏହି ଘଟଣାରେ ୨ ଜଣ ବ୍ରାଉନସୁଗାର ବେପାରୀକୁ ଗିରଫ କରି କୋର୍ଟ ଚାଲାଣ କରିଛି ପୁରୀ ପୋଲିସ ଏସ୍ଟିଏଫ୍ । ଗିରଫ ଦୁଇ ବ୍ରାଉନ ସୁଗାର ବେପାରୀ ହେଲେ ଖୋର୍ଦ୍ଧା ଟାଉନ ଥାନାର ଗୁରୁଜଙ୍ଗର ସୁଶୀଲ କୁମାର ସାହୁ ଓ ସାଗର ସୁନ୍ଦର ପ୍ରଧାନ । ପୋଲିସର ସୂଚନା ଅନୁଯାୟୀ ପୁରୀ ସହରରେ ବ୍ରାଉନ ସୁଗାର ବ୍ୟବସାୟ ଉପରେ ପୁରୀ ପୋଲିସ ଏସଟିଏଫ ନଜର ରଖିଛି । ତେବେ ପୁରୀ ନରେନ୍ଦ୍ର କୋଣ ଅଞ୍ଚଳରେ ଦୁଇ ଜଣ ଯୁବକ ଖୋର୍ଦ୍ଧାରୁ ବ୍ରାଉନ ସୁଗାର ଆଣି ପୁରୀରେ ବିକ୍ରି କରୁଥିବା ଖବର ଆସିଥିଲା । ପରେ ପୁରୀ ଟାଉନ ଥାନା ଅଧିକାରୀ ଓ ବାସେଳି ସାହି ଥାନା ଅଧିକାରୀ ମିଳିତ ଭାବେ ଚଢ଼ାଉ କରି ୧୪୦ ଗ୍ରାମ ବ୍ରାଉନ ସୁଗାର ଜବତ କରିବା ସହ ଏହା ବିକ୍ରୀ କରୁଥିବା ଦୁଇ ଯୁବକକୁ ଗିରଫ କରିଥିଲେ । ଗିରଫ ଅଭିଯୁକ୍ତଙ୍କ ଠାରୁ ନଗଦ ୨୨ ଶହ ଟଙ୍କା, ଦୁଇଟି ସ୍କୁଟି ଗାଡି, ଦୁଇଟି ମୋବାବଲ ଫୋନ ଜବତ କରିଛି ପୁରୀ ଏସଟିଏଫ । ତେବେ ଆଗାମୀ ଦିନରେ ମଧ୍ୟ ପୁରୀ ସହରରେ ନିଶା କାରବାର ରୋକିବା ପାଇଁ ଏଭଳି ଚଢ଼ାଉ ଜାରି ରହିବ ବୋଲି ପୁରୀ ଅତିରିକ୍ତ ଏସପି ମିହିର ପଣ୍ଡା କହିଛନ୍ତି ।
