ପ୍ରବଳ ବର୍ଷା ଯୋଗୁଁ ସମ୍ବଲପୁର ତଳି ଅଞ୍ଚଳରେ ବନ୍ୟା ବିତ୍ପାତ, ପ୍ରଭାବିତ ୧୧୩୮ ଜଣଙ୍କୁ ୭ ଆଶ୍ରୟସ୍ଥଳକୁ ସ୍ଥାନାନ୍ତରିତ

ସମ୍ବଲପୁର : ଗତ ତିନିଦିନ ଧରି ଲଗାଣ ବର୍ଷା ଫଳରେ ସମ୍ବଲପୁରର ତଳି ଅଞ୍ଚଳରେ ପଛୁଆ ପାଣି ପଶି ବନ୍ୟା ପରିସ୍ଥିତି ଦେଖାଦେଇଛି, କାରଣ ସଂଲଗ୍ନ ମହାନଦୀ ପୂର୍ଣ୍ଣିମା ହୋଇ ବୋହୁଛି ଓ ନଗର ମଧ୍ୟରୁ ବର୍ଷାଜଳ ନିଷ୍କାସିତ ହୋଇ ପାରୁନାହିଁ । ଗତରାତି ପର୍ଯ୍ୟନ୍ତ ପ୍ରଭାବିତ ତଳି ଅଞ୍ଚଳରୁ ୧୧୩୮ ଜଣଙ୍କୁ ଉଦ୍ଧାର କରାଯାଇ ବିଭିନ୍ନ ସ୍ଥାନରେ ସଞ୍ଚାରିତ ୭ଟି ଆଶ୍ରୟସ୍ଥଳୀରେ ରଖାଯାଇଛି ଓ ପ୍ରଶାସନ ପକ୍ଷରୁ ତାଙ୍କୁ ଶୁଖିଲା ସହ ରନ୍ଧାଖାଦ୍ୟ ଦିଆଯାଉଛି । ଗତ ବିଳମ୍ବିତ ସନ୍ଧ୍ୟାରେ ଜିଲ୍ଲାପାଳ ଅନନ୍ୟା ଦାସ ନିଜ କାର୍ଯ୍ୟାଳୟରେ ସାମ୍ବାଦିକମାନଙ୍କୁ ଡକାଇ ବର୍ତ୍ତମାନ ସ୍ଥିତି ବିଷୟରେ ସୂଚନା ଦେଇଛନ୍ତି । ଉପରମୁଣ୍ଡରେ ପ୍ରବଳ ବର୍ଷା ଯୋଗୁଁ ହୀରାକୁଦ ଜଳଭଣ୍ଡାରରୁ ପ୍ରତି ସେକେଣ୍ଡ ପ୍ରାୟ ୫ ଲକ୍ଷ ଘନଫୁଟରୁ ଊର୍ଦ୍ଧ୍ୱ ବନ୍ୟାଜଳ ମହାନଦୀରେ ନିଷ୍କାସିତ ହେଉଛି ଓ ଏହା ପୂର୍ଣ୍ଣଗର୍ଭା ହୋଇ ବୋହୁଛି, ଏଣୁ ସ୍ଥାନୀୟ ଉପନଦୀ ଓ ନାଳ ଦେଇ ପ୍ରବାହିତ ବର୍ଷାଜଳ ନଦୀକୁ ଯାଇପାରୁ ନାହିଁ ଫଳରେ ଏହି ଜଳରାଶି ପଛକୁ ଘୁଞ୍ଚିବା ସହ ତଳି ଅଞ୍ଚଳରେ ମାଡ଼ି ଯାଉଛି । ନଗରର ବିଭିନ୍ନ ତଳିଆ ସ୍ଥାନରେ ଏକତ୍ରିତ ଜଳରାଶିକୁ ୨୭ଟି ଉଚ୍ଚଶକ୍ତି ସମ୍ପନ୍ନ ପମ୍ପ ସାହାଯ୍ୟରେ କଢାଯାଉଛି ଓ ଦରକାର ପଡିଲେ ଆଉ କିଛି ପମ୍ପ ଲଗାଇବା ପାଇଁ ପ୍ରଶାସନ ପ୍ରସ୍ତୁତରହିଛି ବୋଲି ସେ ଆଶ୍ୱସ୍ତ କରିଛନ୍ତି । ଇତିମଧ୍ୟରେ ଆମ ହସ୍ତଗତ ସୂଚନା ଅନୁସାରେ ଆଗାମୀ ଦୁଇ ଦିନ ଧରି ପ୍ରବଳ ବର୍ଷାର ଆଶଂକା କରା ଯାଉଛି ଓ ରେଡ ଆଲର୍ଟ ଜାରି କରାଯାଇଥିବା ଅଞ୍ଚଳରେ ସମ୍ବଲପୁର ଜିଲ୍ଲା ସାମିଲ ରହିଛି ।