ଦଶପଲ୍ଲା : ଦଶପଲ୍ଲା ବ୍ଲକ୍ ଅନ୍ତର୍ଗତ ପୋଖରୀଗୋଛା ପଞ୍ଚାୟତରେ ଆସନ୍ତା ମେ ୨ ତାରିଖ ଦିନ ହେବାକୁ ଥିବା ସରପଞ୍ଚ ପଦବି ପାଇଁ ଉପନିର୍ବାଚନ ନେଇ ରାଜନୀତି ବେଶ୍ ସରଗରମ ହେବାରେ ଲାଗିଛି । ଗତ ପଞ୍ଚାୟତ ନିର୍ବାଚନରେ ସରପଞ୍ଚ ଆସନ ପାଇଁ ପ୍ରାର୍ଥୀଙ୍କ ମଧ୍ୟରେ କଡ଼ା ଟକ୍କର ହୋଇଥିବା ବେଳେ ଏହି ଉପନିର୍ବାଚନ ପାଇଁ ଏବେଠାରୁ ପ୍ରାର୍ଥୀଙ୍କ ମଧ୍ୟରେ ବେଶ୍ ପ୍ରତିଯୋଗିତା ଆରମ୍ଭ ହୋଇଯାଇଛି । ଏହି ଆସନଟି ପୂର୍ବ ନିର୍ବାଚନରେ ସାଧାରଣବର୍ଗଙ୍କ ପାଇଁ ଉଦ୍ଦିଷ୍ଟ ରହିଥିବା ବେଳେ ବର୍ତ୍ତମାନ ମଧ୍ୟ ସମାନ ସ୍ଥିତି ରହିଛି । ଗତ ୪ ତାରିଖଠାରୁ ଏହି ଆସନ ପାଇଁ ନାମାଙ୍କନପତ୍ର ଦାଖଲ ଆରମ୍ଭ ହୋଇଥିବା ବେଳେ ଗତକାଲି ଏହାର ଶେଷ ଦିନ ରହିଥିଲା । ଯାହାକି ସମୁଦାୟ ୬ ଜଣ ପ୍ରାର୍ଥୀ ନାମାଙ୍କନପତ୍ର ଦାଖଲ କରିଥିବା ବିଡିଓ ସଂଜୟ କୁମାର ଆଚାର୍ଯ୍ୟ କହିଛନ୍ତି । ଏଥିରେ ପୂର୍ବତନ ସରପଞ୍ଚ ଶିବସେନ ନାୟକଙ୍କ ପୁଅ ସୀମନ୍ତ ନାୟକ ଓ ଝିଅ ସୌଭାଗିନୀ ନାୟକଙ୍କ ସମେତ ବିଶ୍ୱରଞ୍ଜନ ଜାନୀ, ସୁବଳ ଚରଣ ନାୟକ, ସୁବାସ ବେହେରା ଏବଂ ବଳଭଦ୍ର କହଁର ନାମାଙ୍କନପତ୍ର ଦାଖଲ କରିଥିବା ବ୍ଲକ୍ ପ୍ରଶାସନ ପକ୍ଷରୁ ଜଣାପଡ଼ିଛି । ୧୦ ତାରିଖ ଦିନ ଯାଞ୍ଚ ପରେ ଯୋଗ୍ୟ ପ୍ରାର୍ଥୀଙ୍କ ତାଲିକା ପ୍ରକାଶ ପାଇବ । ୧୨ ତାରିଖ ଦିନ ପ୍ରାର୍ଥିପତ୍ର ପ୍ରତ୍ୟାହାର ଏବଂ ପୂର୍ଣ୍ଣାଙ୍ଗ ପ୍ରତିଦ୍ୱନ୍ଦୀଙ୍କ ତାଲିକା ପ୍ରକାଶ ପାଇବ । ମେ ୨ ତାରିଖ ଦିନ ପୂର୍ବାହ୍ଣ ୭ଟାରୁ ଅପରାହ୍ନ ୧ଟା ପର୍ଯ୍ୟନ୍ତ ନିର୍ବାଚନ ଅନୁଷ୍ଠିତ ହେବ । ୪ ତାରିଖ ଦିନ ପୂର୍ବାହ୍ନ ୮ଟାରୁ ବ୍ଲକ୍ କାର୍ଯ୍ୟାଳୟରେ ଗଣତି ଏବଂ ଘୋଷଣା କରାଯିବ । ୬ ତାରିଖ ଦିନ ନିର୍ବାଚନ କମିସନଙ୍କ ନିକଟରେ ଏହାର ରିପୋର୍ଟ ଦାଖଲ କରାଯିବା ନେଇ ସୂଚନା ମିଳିଛି ।
