ନବରଙ୍ଗପୁର: ଆଦର୍ଶ ସ୍ନାତକ ମହାବିଦ୍ୟାଳୟ ନବରଙ୍ଗପୁର ଠାରେ ବିଶ୍ୱ ତମାଖୁ ବର୍ଜନ ଦିବସ ପାଳିତ ହୋଇଥିଲା । ମହାବିଦ୍ୟାଳୟର ଅଧ୍ୟକ୍ଷ ଡ଼. ରଞ୍ଜନ କୁମାର ବେହେରାଙ୍କ ସଭାପତତ୍ୱରେ ଆୟୋଜିତ କାର୍ଯ୍ୟକ୍ରମରେ ମୁଖ୍ୟ ବକ୍ତା ଭାବେ ଡ. ଅରବିନ୍ଦ କୁମାର ଓଝା ଏବଂ ମନ୍ମଥ କୁମାର ମାଝୀ ଯୋଗ ଦେଇ ଛାତ୍ରଛାତ୍ରୀଙ୍କୁ ତମାଖୁ ସେବନରୁ ନିବୃତ୍ତ ରହିବାକୁ ପରାମର୍ଶ ଦେଇଥିଲେ । ମହା ବିଦ୍ୟାଳୟର ଜାତୀୟ ସେବା ଯୋଜନା ଅଧିକାରୀ ସହକାରୀ ପ୍ରଫେସର ରାଜୀବ ଜାଲ ସ୍ୱେଚ୍ଛାସେବୀ ମାନଙ୍କୁ ନିଜ ପରିବାର ସହ ପାଖ ପଡୋଶୀଙ୍କୁ ତମାଖୁର ଭୟାବହତା ସମ୍ପର୍କରେ ଅବଗତ କରାଇବା ପାଇଁ ଆହ୍ୱାନ ଦେଇଥିଲେ । କାର୍ଯ୍ୟକ୍ରମର ଅନ୍ତିମ ପର୍ଯ୍ୟାୟରେ ମହାବିଦ୍ୟାଳୟର ସ୍ୱେଚ୍ଛାସେବୀ ମାନେ ପୋଷ୍ୟ ଗ୍ରାମ ଟିର୍ଲିଆମ୍ବଗୁଡାକୁ ଏକ ରାଲିରେ ଯାଇ ଗ୍ରାମରେ ସଚେତନତା ସୃଷ୍ଟି କରିଥିଲେ । ଏହି କାର୍ଯ୍ୟକ୍ରମରେ ଶ୍ରାବଣ କୁମାର ପୁଝାରୀ ଓ ଜିଭିଭି ରଞ୍ଜିତା ସହଯୋଗ କରିଥିଲେ ।
